美國財政部上年制裁特首林鄭月娥，雖則林鄭話自己不嚮往美國，不過佢嘅細仔林約希Joshua喺美國哈佛大學修讀數學博士，制裁影唔影響到佢，就成為一粒大花生。傳真社舊年派人去美國「搵仔」失敗，發現林約希已經唔喺美國，最後訊息係「家有急事」回港，但實際行蹤不明。之後又有蘋果讀者發現疑似林約希喺交友App出現，顯示地點係身處深圳或中山，之後就冇佢消息。直到日前傳媒再發現林約希，佢仲話自己身處香港。
《壹週刊》日前報道，林約希喺一個學術網上交流會現身，外貌同以前公開相片差好多，留咗一頭長髮，潮戴頭箍，佢身處一間白色房間，身後嘅組合櫃只有零星幾個盒，似乎得好少個人物品，唔似長期居所，窗簾嘅款式，就同禮賓府用嘅款有幾分相似。
喺演講結束後，其中一位外國參加者可能有留意林家被制裁嘅新聞，笑笑口問林約希喺咪仲身處波士頓，林約希顯得有啲唔自然，回答「I am actually in Hong Kong（我其實身處香港）」，參加者再追問香港情況，佢就話比波士頓好。有連登仔睇完片段，都替高舉過英國國旗嘅林約希擔心，因為國安法不着邊際，分分鐘指控林約希點解唔貢獻國家優秀嘅研究院，懷疑有人利用學者交流勾結外國勢力。咁到底林約希𠵱家係咪真喺香港？定係大灣區受「保護」？呢啲國家機密嘅嘢八方都係唔亂講，等777自行交代。
李八方