香港PoPo唔肯認誠信形象破產，反賴畀假消息抹黑，上年中仲拍板搵專拍警察片嘅林超賢幫手拍咗條自high宣傳片《守城》出嚟，仲有PK鄧扮散仔上陣客串，條片前日終於出街，不過入面有好多情節，同PoPo解釋7.21唔見人一樣，都係充滿犯駁。
好似PK鄧扮散仔上陣咁，有網民問話PK鄧係咪博出鏡要見大頭，鏡頭影佢用個盾做掩護，但就成個頭伸出個盾外面，唔通博去送頭畀恐怖分子開槍打中？另外，片入面恐怖分子將炸彈放喺青衣油庫，畫面仲喺岩洞入面，究竟乜恐怖分子會咁仁慈將炸彈放去人迹罕至嘅地方，仲務求將恐襲殺傷力減到最低？然後鏡頭一轉，EOD（爆炸品處理課）話爆炸範圍有兩公里，然後將成公斤TATP炸彈拎去油庫前引爆，唔講幾乎以為佢哋先係恐怖分子！
結局當然係PoPo行動成功，但數番出過鏡起碼23個恐怖分子，有最少17人畀PoPo就地槍決，PoPo喺戲入面殺得人多絕對唔係浪得虛名。話時話，拉一個恐怖分子但畀成個團夥走甩，靠PoPo咁去「守城」，香港人應該凶多吉少就真。
李八方