【本報訊】懷孕近八個月的孕婦上周三在土瓜灣遇警方截查，被警員指控阻差辦公及辱罵「死肥婆」，一度遭手銬反鎖雙手，激動得頭暈跌坐地上，可憐孕婦疑受驚過度，前日早產誕下不足月的男嬰。孕婦的胞姐昨表示，警方至今一直未有聯絡她們，妹妹得知初生兒須躺氧氣箱，留醫深切治療部，終日以淚洗面，情緒較易受波動，須約見心理醫生。
涉事孕婦劉女士仍留醫伊利沙伯醫院，未知何時可出院，其胞姊稱妹妹預產期原定在4月，經此一嚇提早分娩，「入院嗰陣醫生已經打咗三針安胎針，希望佢情況穩定返先，唔好咁早生，但都仲係見紅（血），去到噚朝8點就生咗出嚟。」
胞姊指，妹妹分娩後一直未與初生兒子見面，知得兒子須「瞓氧氣箱」，留醫深切治療部，一直茶飯不思，「（阿B）重一點幾公斤，好細隻，插住條管，又唔可以摸又唔可以抱，感覺好難受。」她指妹妹自入院後情緒波動，院方安排約見心理醫生，「食唔到瞓唔到，瞓一至兩個鐘就醒，食飯又食得一兩啖，一提返起呢單嘢，佢就好激動。」
她引述妹妹表示，當時警員曾向她說，會將當日負責案件的警員編號交予她，以用作日後投訴之用，「粗魯講句，投訴佢有屁用咩，呢啲警員發生咁多事都仲可以繼續升職，妹妹都未一屍兩命點會（投訴）有用，可能要一屍兩命先至有用，但可能得返一句抵死囉。」警方早前回覆，指事後尋獲目擊者，並向其錄取口供協助調查，會根據案情及證據，以不偏不倚的專業態度作適當跟進，任何人士如認為於警方處理任何事件時受不合理對待，可向投訴警察課投訴。