【《蘋果》專訪】
【本報訊】去年台灣銅鑼灣書店開張日，總統蔡英文送上《聖經》阿摩司書著名金句：「惟願公平如大水滾滾，公義如江河滔滔。」但當公義未臨，如何在黑暗中自處？中文名取自《三國演義》關公的美籍人權律師關尚義（John Clancey）來港逾半世紀，今年之始一場初選大搜捕，由往日的警署訪客變為羈留室「座上客」，獲釋後多間外媒爭相訪問。社會高壓，他希望港人縱使感到絕望，仍不應言棄。回望當初抵港那貪污橫行年代，見證港人越來越敢於抗爭更有自信尊嚴，始終相信栽花結果有時：「你唔好睇小自己呀，要有耐性但唔係被動，有啲效果要一段時間先至見到，所以繼續爭取繼續有希望，唔好太快灰心然後放棄。」
記者：黃翠儀
今年1月6日國安處以涉違反國安法大搜捕去年民主派初選人士，關尚義擔任司庫的民主動力當時主力協調初選，那天清晨警察突然拍門，家人將他喚醒，他感到驚訝但並不擔心，「我知可能屋企人都驚，但我自己係冇嘢，我覺得我係冇犯過咩罪，淨係爭取民主」。身為首個因國安法罪名被捕的美籍公民，連美國時任國務卿蓬佩奧亦有回應事件，關尚義以流利廣東話笑說他沒有特權，被捕時面對相同的程序，「同時我都係一個香港居民呀，咁多年我都係屬於香港一部份，我都係香港人」。
審訊和牢獄，近年像魚網不斷延伸張羅至公民社會各個角落。關尚義育有三子女，沒有人會樂見父親或丈夫坐監，「如果係判有罪我覺得係唔啱，如果要坐監更加係唔啱，我諗冇人想坐監，但如果需要，我係會接受」。在香港爭取民主的路上，他從來不是單單一名旁觀者，曾經是走上街頭的神父，回歸前曾有份爭取直選。2016年法律界反對人大釋法的黑衣遊行，他高大的身影便走在其中。
年屆79歲，但他從未言退，保釋翌日回到律師樓照常上班，一生人活出公義。1941年二戰時期在美國新澤西州出生，大學時加入瑪利諾修會當神父，受訓期間曾參與反越戰示威，亦試過每逢周末拍門為黑人登記做選民。黑人民權運動對他影響深遠，受馬丁路德金著作啟蒙，深信要以愛人為行動動機，「唔可以用暴力呀，因為要改變嘅係人心」。
1968年獲神父會委派來港，先到新亞書院讀兩年廣東話，曾到橫頭磡老虎岩居住並擔任該區神父，後來獲已故徐誠斌主教邀請加入天主教大專聯會。當時教會有很大突破，由幫助個人改為推動社會改革，因為要在社會中建設天國。有朋友為他取名關尚義，「嗰陣我睇完《三國演義》，關公佢都係爭取正義呀，我鍾意呢個名，但係佢用暴力我冇用暴力」。
那些年努力為基層爭取權益，走到社會最弱勢群體之中，見盡不公義，「嗰陣時好多貪污，好多人投訴警察收黑錢，小巴有啲特別嘅貼紙要貼出嚟，如果唔貼就會抄牌」。他最傷心的是，曾在公立醫院探訪一名老婆婆，「婆婆話想飲水，但佢要喺枕頭攞一蚊出嚟畀人，先至有杯水飲」。住屋、衞生、教育、工人權益等問題，他都深有體會，深信要改變制度才有出路，「要改變個結構、制度，先幫到更多嘅人」。
1985年，他為了結婚而不再做神父，但關注人權工作未停，到90年代更以半百之齡報讀法律課程，成為人權律師。數十年來，他見證越來越多人關心社會，亦明白改變需要過程，「好多時你提出個問題，政府初頭都係否認、反對、畀壓力，但只要更多人繼續講個問題出嚟，先會令到佢有機會改變」。現時社會高壓是不爭事實，時勢艱難，香港是否已走到最壞的時代？「未必啦，因為初期嚟香港嘅時候，中國內地有文化大革命，我嚟之前一年有好多爆炸，1967。」他憶述，其後殖民地政府曾執行多項強硬政策，例如將三人以上集會視為非法集結的《公安條例》，當年他要走到美國領事館才能參加反越戰示威。未到最壞，但制度倒退亦是赤裸裸事實，自2015年人大常委會頒佈「8.31決定」，已必須承認是一個退步，只是他點點頭說，「可能我性格啦，長期來講我睇歷史趨勢，覺得遲早香港會有民主，除非係冇咗HKSAR冇咗個特區，一日仲有《基本法》嘅話，或者係可以變返民主社會」。
國安法下，他首先關心人權會否被凌駕，「當初立法話因為有好多暴力呀，但有陣時係冇用暴力嘅人，跟法例做嘢嘅人都係被拉，終審法院要決定，因為我嚟睇係有好明顯衝突，一方面《基本法》保障國際人權權利，另一方面有國安法，睇睇佢決定邊個係為主」。
相比被捕，他更加擔心風雨欲來的「司法改革」。他解釋：「有人提議成個制度都要改變，我未知佢哋心目中想點改，但係如果改得太多，或者就會變成一個唔法治嘅社會，唔好等到reform，如果覺得係會整爛現有一個好嘅制度、法治社會，你要出聲啦，唔好畀佢哋去改。」
他形容，若要有真正的「國安」，最好的基礎是一個民主社會，「政府知道人民係點諗、會唔會支持佢哋嘅政策，畀人去發表意見，政府去考慮睇睇使唔使再修改」。聽來像烏托邦，但歷史告訴他，沉默不會令社會進步，「睇返每個階段都係會有人出現爭取民主，無論係非洲南美洲北美洲呢啲國家，都會有啲新嘅人開始有希望有理想，有新嘅組織出現要求改善社會」。
或許爭取公義，無關勝負不論時日長短，只因一日未見江河滔滔，他仍決心以滴水穿石般的毅力走下去。信仰之外，亦因他對港人懷有信心，「要承認𠵱家係一個好惡劣天氣，如果係10號風球，你會唔會出街行山？你會喺屋企等候。但我相信，一定會有有良心有原則嘅人出現，睇睇環境係好嘅時候，都係會再出嚟做嘢。」