由2019年夏天開始執教中超球隊大連人嘅西班牙名帥賓尼迪斯，上周六喺個人網站宣佈，因武漢肺炎疫情決定唔再返中國，同辭去大連人主帥一職。有傳肥賓下一站會係蘇超些路迪，如果係真，咁佢就會同教緊格拉斯哥流浪嘅謝拉特師徒交手，當年肥賓擔任利物浦領隊，最威水當然係喺2005年帶領有謝四做隊長嘅紅軍勇奪歐聯冠軍。
2019年夏天，同紐卡素分手後嘅賓尼迪斯接掌大連人，有指佢嘅年薪高達1,300萬歐元（約12.2億港元），教咗半季以6勝3和6負第9名完成球季。上季只帶領大連人取得第12名嘅肥賓，自上年11月中超球季完咗後，佢就返咗去英國陪屋企人，雖然新季嘅中超預計會喺3月開始，早前更指大連人想同賓尼迪斯續約多兩年，但肥賓擔心返咗中國後，會因為疫情同家人長期分開，最終呢位60歲嘅前利物浦領隊決定唔再擔任大連人教練。
肥賓喺個人網站發表告別信：「好唔好彩，同上年一樣，武肺病毒改變咗我哋嘅生活同計劃。好遺憾，由今日開始，我同我嘅教練團隊唔會繼續喺大連人執教。疫情持續，喺作出呢個決定前，我認為家庭先係我最優先嘅考慮。所以喺呢種情況下，好遺憾只能講拜拜，但同時，我認為大連人嘅未來係一片光明。」
回復自由身嘅賓尼迪斯，隨即同前東家紐卡素、車路士扯上關係，有望重返英超，不過有指肥賓下一站，將係蘇超嘅些路迪。今季表現失色嘅些路迪目前已落後榜首格流23分（踢少3場），球隊已對領隊連儂冇晒信心，希望可以由肥賓接手改變現狀。假如事成，肥賓就有機會喺蘇超同2005年一齊幫利物浦贏歐聯嘅謝拉特上演師徒對決。
謝拉特今季帶領嘅格流真係勢不可擋，上周六聯賽係謝老四領軍嘅第150場賽事，結果主場大勝羅斯郡5:0，今季聯賽繼續不敗，以22勝3和嘅戰績，遙遙領先第2位些路迪23分。格流喺謝拉特嘅帶領下，今季好有機會終結些路迪聯賽10連霸嘅美夢，打破宿敵多年壟斷蘇超嘅局面。
