呢個特區政府，辦事連環蝦碌，令市民笑又唔係，喊又唔係，簡直啼笑皆非，究竟司長局長署長們有冇落區深入民間探討民情㗎？成日閉門造車，制訂政策一味紙上談兵，好似係參加公眾考試寫答案咁，吹牛無敵，實戰無方。依家冇咗民主派議員批評監察，益發暴露咗建制派各據山頭，凡出事就向林鄭放冷箭。相信禮賓府中人會好懷念昔日立法會有民主黨工黨等等等，乜唔係啫，民建聯工聯會啲箭冇咗胡志偉陳志全等人為對象，咪射箭入亞畢諾道囉。
香港人行年宵買花，一向習慣係吃完團年飯之後，晚上十點幾先至出動，住在東區嘅朋友，更多到子夜之後先至出發，到花市希望執平貨，花農亦會在凌晨兩三點左右，將賣剩嘅花割價求售，以免再搬運，慳回運費。既然話要阻止疫情傳播，停辦年宵花市，民眾亦可理解，但點解突然轉軚，唔搞又搞，搞出個抽籤分配攤檔，控制入場人數，中午後有清潔時間等等花招呢？陳肇始局長話係從善如流，究竟有邊啲「善人」向佢提意見，係唔係何俊賢及漁農界六十個選委呀？一個何俊賢議員唔會夠牙力，背後一共六十張選委選票就足以令「好打得」願意聽話，繼而向下屬陳局長「善言相勸」嘅。轉軚以為可以益番花農，點知兩頭唔到岸，花農畀政府搞到頭暈眼花，更加嘈。文匯報大字標題話政府「跪低轉口」，其他報紙批評政府「朝令夕改」，「轉軚」之聲不絕，如果通識教師仍然有膽唔怕釘牌嘅話，不妨教學生活學活用，課堂上分析「從善如流」、「跪低轉口」、「朝令夕改」、U-turn、轉軚等詞可有異同。
每年左丁山屋企都有一盆蘭花，鬼咁重，左丁山一個人搬唔郁，試問食環署要花市在清潔時段要花農將啲花搬來搬去，花農點會唔㷫過辣雞？晚上街坊搶貨之時限制人流，場內人大可慢條斯理揀花，場外等候嘅就紮紮跳乾着急，場面會好滑稽。其實早話唔辦，花農各展奇謀，租吉舖（現在隨處都有），有一個星期賣花，賣到年初一凌晨，政府本來唔使煩，自有市場運作。陳肇始等官僚又痕（驚疫情）又怕痛（驚漁農界壓力），胡亂出招，結果兩面不討好，唔怪得建制派對佢唔客氣到出晒面了。