「萬人迷」碧咸（右）同曼聯92班嘅加利尼維利（左）、菲臘尼維利同傑斯等幾位前紅魔球星，係英乙球隊沙福特城嘅班主。不過「菲臘仔」嚟緊就要正式叫聲碧咸做老闆喇，事關後者請咗佢做自己間美職球會國際邁阿密嘅教練，上禮拜五仲舉行發佈會。隊波上季首戰美職成績麻麻，結果炒咗教練迪亞高阿朗素，早前就傳過碧咸想搵菲臘仔過檔教波，但佢仲係英格蘭女子國家隊嘅領隊。不過最後菲臘仔決定提早離任，過嚟邁阿密幫碧咸。碧咸講明，請菲臘仔返嚟絕對唔關友誼事，係好欣賞佢對足球態度夠認真。
另外，前港會青年軍夏理士上禮拜四喺美職聯選秀會，以選秀榜眼身份加盟由前荷蘭名將史譚執教嘅FC辛辛那提。現年20歲嘅夏理士喺英國出世，10歲隨曾效力錫周三嘅爸爸移居香港，就讀西島中學，加入港會青年軍，14歲獲澳職球會威靈頓鳳凰睇中，曾代表球會出戰2016至2018年港會七人足球賽。夏理士其後到美國升學，今年獲上季美職聯包尾嘅FC辛辛那提喺選秀會選中。