這句「好＿鍾意香港」，除了是崔允信的心聲，也的確是第十三屆香港獨立電影節內其中一系列的節目名，大家心領神會。
身為獨立電影導演兼影意志創辦人，崔允信一直是獨立電影的重要推手，去年經歷《理大圍城》和《佔領立法會》的電檢風波，再到電影節海報小插曲，正如他在官網上的感言說：「今年決定加上第十三屆，是更有決心一年一年地走下去……」
有決心，不代表沒有掙扎。人在影意志於賽馬會創意藝術中心的工作室，崔允信說：「上個禮拜拉咗五十幾人嗰朝，真係驚驚哋，見到個個都洗晒版，有我哋合作嘅partner會問，會唔會有變化呢？……」說不驚，呃人。
崔允信在訪問中多次說，他真的不是做政治，他只是個電影人。大概這個電影人，比起其他人，更愛香港，更愛電影。
工作室內放滿了不少之前發行過的獨立電影DVD，由新近的《地厚天高》到老好的《月未老》，一排一排，崔允信苦笑：「𠵱家都冇人會有DVD機啦！」始終堅持，一直撐落去。
撰文：文嘉龍
戲院未能重開，第十三屆香港獨立電影節這星期也變成網上公映，面對網上放映新常態，崔允信樂觀其成，不過，他深信電影院不會消失，「比較成功例子都係Netflix，一個咁大平台可能先有人留意。我諗一定會變，問題係點樣變法。我又覺得戲院唔會完全消失，始終去戲院睇戲係好好嘅事。」
去年底公佈電影節舉行日期時，發生了一段小插曲，事緣海報當中的「香港獨立」和「Hong Kong Independent」字眼設計成被白色油漆抹去效果，只隱約看到殘留痕迹，剩下第十三屆電影節字樣可見。官方在社交平台帖文寫下，「怕與不怕，自不自閹？似有還無，心領神會。」不過，這個海報仍遭印刷廠拒印。
崔允信說，只是一件小事，「唔係話張poster有乜法律問題，係印刷廠唔敢接呢單生意，亦都好似啲戲院唔敢上《地厚天高》情形一樣，《十年》明明票房咁好都唔敢繼續上……我成日覺得遇到呢啲問題或者危機，喺網上面呻一呻，反而掉返轉即刻有好多人幫你，呢個又話識呢個廠可以印，結果都係解決咗！」
再之前，崔允信亦經歷了《理大圍城》和《佔領立法會》的電檢風波，上映前一日被通知要加上警告字句，而電檢處退還的送審光碟更變成「理大碎片」。面對越來越多的荒謬情節，問崔允信驚唔驚？他說：「唔係好識得答你！」卻令他想起電檢風波之後，到網台與陳皓桓（民陣副召集人）談起這個話題的一幕，「佢問有冇壓力，我又望住佢，你知道佢成日俾人拉又孭住好多case喺身，我都唔知點答佢，佢就噏咗一句，『我唔同呀，我哋呢啲做政治嘅，預咗！你哋做電影！』我就諗，我真係唔係做政治，我唔係話驚去表達啲乜，我的而且確係做緊電影嘅嘢！」
總會有情緒，「香港𠵱家嘅氣氛，我又唔想講到好瀟灑話唔使驚，你諗下，朝頭早醒嘅時候，見到有人俾人拉，你都會唔開心啦大佬，好似你哋老闆，所以話完全冇情緒係呃你，但理性上知道，我真係做電影喎，我做咗咁多年都有問題嘅話，其實你遲早都有問題㗎！」
崔允信說，雖然條紅線越來越近，但都不能夠自己「縮咗先」，「即係好似有一個機構可以話畀你聽，有乜可以拍得，有乜唔拍得，要教你點睇戲，呢個已經唔係政見問題，係言論自由或者創作自由問題。直到有一日，原來真係話有禁片，或者有啲字唔可以喺套戲裏面出，或者某一啲行為等如咗『四仔』；原來有一日去到咁係唔得㗎喎，原來6點鐘會有人敲門，食食吓飯都有問題嘅時候，真係冇得講！」
一路走來，始終如一。崔允信由1997年創立影意志開始，一心為香港的獨立電影開天闢地，他說影意志只是一個藝團，是藝發局資助的一個團體。鍾情獨立電影的崔允信，兩年前重看陳果的《香港製造》，依然覺得驚艷，「真係好犀利，用一種好機動好低成本好唔傳統嘅方法，去講佢自己想講嘅嘢，雖然入面可能有啲粗糙地方唔係好完美，𠵱家睇返完全唔過時。」主流與獨立，有時可以互流，「Christopher Nolen（《天能》導演）以前都係獨立電影導演啦，一定有人鬧佢妥協，佢妥協得嚟可以將新嘢帶入去，陳果導演都係《香港製造》慢慢吸引咗去工業，佢都要自己鍾意搞返《三夫》或者《墮胎師》呢啲戲。」
崔允信自己亦有執導筒拍戲，不過多年來產量不多，1997年回歸他就拍了許鞍華的紀錄片《去日苦多》，二十多年後的今天，出現了由文念中執導的第二齣許鞍華紀錄片《好好拍電影》。崔允信想起，「因為《好好拍電影》係電影發展局有份資助，我仲記得佢（電影發展局）有份搵我做consultant去睇呢個project，我突然間諗起呢個淵源都幾得意。」
當年拍的《去日苦多》，崔允信說很感激許鞍華，「台灣畀錢拍，拍97前阿Ann（許鞍華）一啲感受，佢需要有一個人去訪問佢，冇理由全部自己拍自己，佢就搵咗我去做呢件事。呢件事我好少講，我好感激許鞍華導演，我記得當時佢要拍《半生緣》，做後期剪接佢就返咗國內，佢叫我負責跟剪片，嗰時仲係剪菲林，完晒成件事佢先同我講，因為紀錄片剪接係好重要一部份，佢覺得可以加埋我個名去做執行導演，我已經好開心啦，點知仲未夠開心，跟住佢攞咗張cheque（支票）出嚟畀我喎，我好老實講句，我喺電影工業未遇過一個咁好嘅人囉！」
有付出就有收穫，同樣地，面對新一代，崔允信說自己雖然談不上有甚麼大幫忙，但至少起碼有渠道令到他們的作品有更加多機會問世，「今次我哋有一個節目叫《我真係好＿鍾意香港》，《夜更》好多人都知啦，我覺得一定要包埋落去：同時間有一個就係從細路仔出發去睇網上軍師，講網上軍師好似好勁，但出到嚟就好驚震晒，套片叫《出去》，我覺得好得意；另外有一套短片就係講有手足走咗去台灣，講佢喺台灣嘅生活。」
崔允信1988年在美國大學電影系畢業，回港後曾在無綫當助導，那個年代的電視台和電影業正值黃金時代，但崔允信自言並不適應，「我又要承認同我性格有關，本身性格唔係咁適應成個工業製作模式，我個人唔係好出聲，有啲時候又太認真，所以我承認唔係做得太好。」
回想在電視台的日子，那時候猛人雲集，「我諗嗰時同𠵱家好唔同啦，𠵱家我都唔知有咩後生會想加入TVB！我入去最起碼杜琪峯導演、韋家輝導演仲喺度，再唔係，睇明星都開心，嗰啲真係明星！我記得我都跟過幾套，甄子丹都有份，劉嘉玲又有，𠵱家我真係唔知入TVB個心態係咩！𠵱家你望住成個畫面都唔知邊個係主角，雖然咁講好似好衰，我都話起碼我以前入去係拍明星！嗰時甄子丹直頭未紅，我記得我拍過佢一套關於飛虎隊嘅戲，你一睇，已經有個格喺度，𠵱家你會覺得佢哋啲劇玩玩吓好似學生作品！」
當年今日，的確是兩個世界。正如當年在美國讀書的崔允信，完全沒有想過留在當地，相反今天很多人都趕住走，崔允信說：「我成日覺得點解要走，有啲人佢一定要走，選擇走定係選擇坐監都好，其實佢都好大犧牲，因為佢一走咗，代表佢唔返得嚟！我成日都講，我真係唔係做政治，如果我走，譬如有一日當香港人好大壓迫，連我哋電影都做唔到，於是我要走去北美洲搞一個『北美洲香港獨立電影節』，要喺嗰邊先放映呢啲戲，即係代表我以後唔返嚟！」
2019年前後，成為崔允信思考去留的分水嶺，「16年《亂世備忘》去咗溫哥華國際電影節，以前覺得啲嘢好貴，𠵱家周圍都平過香港，原來去溫哥華downtown可以食到一個質素好過香港，然後平過香港，喺16年嘅時候，覺得係咪將來都可以考慮吓呢？反而19年之後，香港一路發生嘅嘢，又變返我好似唔捨得離開呢個地方。上個禮拜拉咗五十幾人嗰朝，真係驚驚哋，覺得如果喺外國會唔會仲驚呢，喺香港唔係話唔驚，唔係話件事唔可怕，但係個荒謬好快趣會超過嗰樣嘢！」
面對現實的生存問題，如果藝發局減少撥款，如何走下去？「我覺得個團體唔係最重要嘅嘢，萬一cut咗錢，我諗我個人或者呢一班導演，係可以持續嘅，其實最主要係你做緊嘅嘢係為咗乜，簡單嗰句就係毋忘初衷，我係想搞獨立電影，唔係想搞影意志，呢個亦都同年紀有關，我做導演喺現場係開心，但係如果𠵱家你問我，我見到今年呢十個八個影片嘅出現，我有個角色令呢啲戲可以接觸更加多人，重要過自己係咪嗰個導演。如果十年前講出嚟就係客氣說話或者呃你，懶型，但係𠵱家個年齡就真係會咁睇，譬如《地厚天高》咁成功，我係好開心㗎！」
《地厚天高》內梁天琦有一句，「走？點解走嗰個要係我呀？」
崔允信2001年拍過《憂憂愁愁的走了》、2008年拍過《愛情萬歲》，前者有余文樂，後者有周柏豪，20年後這兩位男主角都同樣成為「藍神」了。當年與今日，如何看兩人？作為一個厚道的導演，崔允信說：「嘩，唔好講呢啲喇！等如一套戲好壞，私底下傾偈實會，但公開你唔會話套戲好渣呀！」
問他何時再做導演，他笑說：「可能要搵杜汶澤喎！其實好得意，兩三年前我係畀咗一個古仔佢睇，同佢傾過少少嘢，想搵佢做監製！」
崔允信監製過《地厚天高》，女將導演林子穎已被杜汶澤招攬旗下開新劇，同路人，一齊撐！