昨日篇稿剛剛寫好，傳遞畀編輯之後，電話響起，居然係好耐冇見嘅投機P，投機P話：「救命呀，今日股市推高升咗近一千點，我畀券商追孖展追到氣咳，啱啱去完銀行入數。你點睇呀？」左丁山笑佢：「你係建制派喎，咁都撈唔到北水，竟然與中央對着幹，沽空算你抵死！」投機P話：「我係表面藍，為咗搵食啫。我在商場有好多老友，個個嗌死，財爺又話失業率會創新高，經濟前景暗淡，加上疫情嚴重，我見恒指升到二萬九千點，咪沽空恒指囉，點知即刻輸到仆，有冇明燈呀？」
投機P有正職，高薪一族，但就好炒期貨，40年前識佢，就係在期貨公司，佢有輸有贏，好景時在東半山買咗四間豪宅，87年股災後又試過乜都賣清光，幾年後進入90年代，炒期貨順風順水，直至1999年不識趨避，幾乎在科網股狂潮沒頂。
老兵不死，面壁十年，諗住份工幾高薪，仔女成才，又試在金魚缸出出入入，估唔到今次又俾券商追孖展。其實投機Ｐ屬於「基本派」，專研經濟實況、公司業績、管理能力等研究買定賣，又即係畢菲特之買入長期持有一族，但呢派王道投資術在21世紀，特別係在2008年金融海嘯之後，只宜用真金白銀買入長期價值股，長揸不放，一旦用來買空賣空恒生指數期貨，就十分危險。
金融海嘯之後，中央銀行發明咗QE（量化寬鬆）呢味嘢，央行一於大水漫灌，大力購入國債，繼而乜公司債都買，向市場注入數以萬億美元計資金，將利率降低到近乎零，甚至負利率。於是乎全世界水浸，利息奇低，多餘資金流入資產市場，將財務資產價格推高。從此股市短期買賣不再睇基本價值，只睇資金流向及央行政策，買賣期指（沽空買空）更加要睇大勢（macro trend），唔駛研究經濟基本因素。投機P屬老一派，今時今日沽空恒指，輸死冇命賠。投機P問：「點睇大勢呀？」左丁山笑佢：「你得閒去中聯辦食吓飯，收吓風啦！」投機P嘆一聲：「呢位駱先生好厲害，我有不少舊友都畀佢送走返回內地，換咗好多新人，我唔識嘅嘞！」投機P講，過往中聯辦幾鍾意啲本港豪門富二代富三代，點知發覺班公子哥兒西化嘆紅酒，堅離地，現在開始諗新方向，嘗試搵新香港人走出台前喎！