工聯會立法會議員郭偉强噚日藉住《施政報告》致謝議案辯論機會，滲自己私貨落去，大講要立法打擊假資訊假新聞，雖然被行會成員、新民黨主席葉劉淑儀截住，但都阻止唔到郭偉强，但講還講，作為議員都要有料先好講，好似佢竟然話英國老牌報紙《衞報》（The Guardian）係世衞出版嘅報章。用假資訊嚟打擊假資訊，真係笑死人！
其實郭偉强發言時，葉劉一度話𠵱家係辯論致謝議案，質疑議員利用呢啲時間鼓吹自己嘅立法建議係咪恰當？代主席馬逢國姑且問吓郭，佢嘅發言係咪同《施政報告》有關呀？郭話係就獲開綠燈。
郭偉强發言時，大肆批評新屋嶺、8.31等係假資訊，之後打算引述流行病學家庫哈爾斯基（Adam Kucharski）喺英國《衞報》嘅說話：「打擊網絡謠言嘅最好方法，係好似對待真正病毒咁對待佢哋」，以增強自己說服力。郭偉强咁講：「另外亦都有《衞報》啦，我相信都係叫世界衞生組織嘅報章。」然後又將庫哈爾斯基嘅說話演繹成：「將對待呢啲假資訊嘅態度，一樣認真地對待呢啲新冠肺炎病毒。」呢段嘢好快喺網上瘋傳，網民無不恥笑佢，話佢不學無術都算，最慘仲要特登畀人知，以為自己好醒，有人揶揄，郭偉强可能仲以為，衞視係世衞嘅電視台、英國《每日郵報》係郵局出嘅報章。八方大膽估計，郭偉强係專登講錯晒啲嘢，等大家明白，假資訊嘅禍害。
李八方