圈中唔少情侶同夫婦相處多年依然甜到漏，好似張繼聰同謝安琪、王馨平同富商老公李家輝，除咗夫妻，仲有蔡依林嘅母女情，同Twins姊妹情都可以長長久久。張繼聰同謝安琪結婚14年依然恩愛，前日佢上載老婆甜笑依偎相，留言︰「會繼續努力，令你keep住呢種幸福嘅笑容」，更hashtag「象牙婚」。謝安琪回覆︰「睇你表演」，好友鄭融、關智斌、姚子羚留言祝賀，謝安琪代夫一一回覆。
一向低調嘅王馨平罕見晒愛，前晚上載同老公李家輝切蛋糕、嘆紅酒合照，留言︰「生日一定要穿紅色喔！」呢對恩愛夫妻齊齊穿上紅色T恤，非常合拍。
台灣天后蔡依林（Jolin 左）前日喺Ig發佈同媽咪慶祝生日嘅合照，相中仲有家姐蔡旻紋，三母女勁似樣，網友大讚蔡媽媽後生：「根本是姐妹」、「蔡媽媽保養得太好了」，Jolin亦稱媽咪做「小美」同祝佢青春常駐。
蔡卓妍（阿Sa 左）前晚貼出孖鍾欣潼（阿嬌）喺車內食蛋糕相，隔空祝福噚日滿39歲嘅阿嬌︰「仲記唔記得第一次整畀你嘅蛋糕」，因為阿嬌今年生日身在內地。
