股市大漲，成交突破三千億元之日（1月19日），炒股人士重回魚翅撈飯之時，本應全港一片歡欣，偏偏失業率升至6.6%，創16年新高，近20年崛起最快嘅旅行社東瀛遊宣佈遣去120名導遊，賠遣散費2000萬元，大約每人得到十八萬幾，公司算有良心，但打工仔攞住18萬，可以捱得幾多個月？疫情之下，旅行社導遊根本係零收入，做慣導遊可以轉工做邊一行？東瀛遊（6682）是日收市價報4毫，市值二億零一百萬元，遣散費已佔市值10%，比例極高。
目前香港經濟極度不景，股市就興旺到極，券商耀才（1428）首創買賣不收佣金，但去年業績驕人，大派員工花紅（4個月），加薪2%，並發盈喜，截至到12月底之頭九個月發出溢利為5.8億元。同是20年來冒起之新進公司，耀才與東瀛遊命運迥然不同，並不顯示兩公司創辦人之經營能力有大差距，只係大環境對旅遊殘忍，對炒股仁慈而已。
本欄一月五日講2021繼續炒股，就係睇到總體大勢（macro trend），2021年疫情難以驅走，對旅遊餐飲酒店等行業係一場浩劫，但有咗國安法之後，以中共一貫脾性，唔衰得，必定以銀紙來港托市，穩定金融，令股民興奮，以顯國威。果然，美國須要制裁甚麼股票，北水就大量掃入，舉凡中移動，中聯通，中電信，中海外，中芯，皆在美國基金出貨到低位之後，迅速大力反彈。目前情況與1997年七月之前情況有啲相似，港股開始出現泡沫，新經濟股P/E（市盈率）高得驚人，港交所已突破五百元一股，市盈率達67倍，比97年還要高。與97最大不同之處，就是內地2021年GDP已達101萬億人民幣，以6.48計，相等於15萬5千8百64億美元，1997年GDP有9616億美元，增加了16倍，故此托市力量比23年前大得多，至於會托幾耐托到甚麼水位，當然係國家機密，香港醒目股民，識得搭順風車者，應該在沽出五成收回大部份成本之後，餘下股票就放紙鳶，再升故然好，回落亦冇所謂。世界上冇只升不跌嘅股市，千祈咪信政府力量大無窮。
股市愈好，特區政府愈頭痛，失業率高，百業困乏之際，貧富懸殊日益嚴重，對政府不滿情緒不斷升溫，林鄭早已證明係非大將之才，社會治安必壞。