都話香港有低氣壓，要借美食消愁，呢輪食肆嚴重不景，美食割價求售，以前嫌貴嘅菜式，如今自動減價，當然係為形勢所逼。食肆老闆如果在自己物業經營，唔使交租，就會索性關門停業一段時期，伺機復業，因為打開門做生意，燈油火蠟加夥計人工，遠高於每日中午及外賣收入，閂門反為蝕少好多。但絕大部份餐廳要畀租金，閂門停業不是一個選項。
老友A鍾意美食，呢日叫左丁山陪佢去一間以意大利北部菜式為主嘅Castellana，在銅鑼灣開平道，以Piedmont菜式標榜。以前聽餐飲M提過，話係一間超貴餐廳，但呢次見到有set menu，五道菜賣498元，咁又唔算貴噃，可能係已經向疫情形勢低頭。套餐之中有一款Castellana，係最普通不過嘅意大利粉，但—呢間餐廳以它為招牌菜，色香味俱全，令人眼前為之一亮，可惜份量較少，左丁山可以連食三碟。
老友A講起低氣壓，話係佢一位朋友，係初中通識課老師，最近上Zoom課，簡單介紹中國地理，先講地圖，依書直說：「台灣是中國一個省分」，意想不到一位中一女生發問：「爸爸媽媽前年帶我去台灣旅行，我見到台灣唔掛國旗，唔唱國歌嘅，點解台灣會係中國一個省？」朋友教師為之一驚，知道必須謹慎作答，否則容易惹禍上身，但對住中一學生，唔通自1949年講起咩，根本冇時間，又驚學生聽唔明，最後只好咁答：「本書係咁講嘅，大家要知道台灣係中國一個省分。」講得非常政治正確，飯碗要緊也。
老友A話朋友教師覺得教通識，心理壓力太大，成日驚在課堂上講錯嘢，就會畀人向當局舉報，受教育局調查，弄至終身釘牌，所以現在冇熱情去制訂教材及搵資料畀學生參考，鼓勵參與討論咯。睇番星島日報，獨家報導（1月15日），截至2020年10月；教育局接獲262宗投訴教師專業失當，調查226宗後，85宗（37.6%）不成立，其餘有兩名教師釘牌，23名教師受書面譴責，13人遭警告，61宗有機會成新個案，其餘正在程序處理；換言之，一旦被投訴，有近62%機會遭殃，問教師怕未。點解有咁多投訴？因為有藍絲家長篤灰囉。據報導即將有一名官校教師面臨釘牌，若被革職會失退休金，你話今時今日做通識老師，是否恐怖職業吖。