陷入降班漩渦嘅打比郡，禮拜二喺主場爆冷以1:0小勝般尼茅夫，朗尼取得坐正之後嘅首勝。呢位前曼聯球星前排宣佈退休，由暫代領隊「升呢」坐正，點知首場就喺主場以0:1輸畀洛達咸，但第二場比賽終於成功贏波，喺32分鐘嘅角球攻勢憑基斯甸比歷一箭定江山，結束聯賽兩連敗。
朗尼賽後話︰「今仗係場精采嘅勝利。其實球會所有人最近幾個禮拜都好艱難。我希望班球員今晚可以回應到外界嘅質疑，好彩佢哋做到。」朗尼又話︰「呢種態度同渴望，係我哋每場比賽、每個星期都需要嘅。如果我哋做到就唔會輸，當然做唔到就會好似上場咁。如果我哋堅持到比賽計劃同努力，我哋有機會同聯賽嘅任何球隊抗衡。」
除咗朗尼成功贏波之外，好耐冇喺球場出現過嘅般尼茅夫中場韋舒亞，都有得喺今場後備入替上陣，雖然得12分鐘嘅表演機會，但對幾個月冇波踢嘅佢嚟講，都算係有個好開始。