泡泡瑪特（9992）是中國最大而且增長最快嘅潮流玩具公司，憑「盲盒」玩法及得意公仔殺出一條血路。上月掛牌首日已爆升八成，正當炒得火熱之際，內地官媒一盤冷水照頭淋，批評「盲盒」風氣不可長，建議監管部門應進一步規範「盲盒」經營模式，避免為社會和青少年成長帶來負面影響。消息一出，令泡泡瑪特股價急挫，聖誕節假期後，股價由90元急挫至75元橫行。
「盲盒」源自日本，喺購買時從包裝盒上無法得知內裏喺乜嘢玩具，要買完拆開先知道抽到乜。買「盲盒」背後嘅消費心理，不外乎追求刺激感及賭博心態。「盲盒」近年喺內地大行其道，唔少年輕人為抽到隱藏款而一擲千金，同時衍生出二手炒賣市場。
泡泡瑪特擁有過百人嘅創意團隊，同時積極跟全球藝術家展開合作，每年開發盲盒系列數近百套。公司通過持續增長嘅大規模定單，跟優質生產廠建立長期穩定的合作關係，規模效應顯著降低採購成本。至於銷售方面，已鋪設全網銷售渠道，盲盒專營店相比其他業態具有更強沉浸式購物體驗和品牌價值，動銷能力突出，競爭優勢明顯。設計、生產、銷售嘅優勢形成持續正反饋，彼此促進後最終外化為高周轉、高毛利及高淨利嘅財務成果。
目前，泡泡瑪特喺蓬勃發展嘅流行玩具市場中，具有開發及營運高質素IP的能力、廣泛的銷售網絡，以及忠實的粉絲群，喺2019年市佔率達8.5%，具有龍頭地位，廣發證券認為泡泡瑪特合理價值為110.4港元。
古天后