曾經效力過利物浦同車路士嘅西班牙靚仔前鋒費蘭度托利斯，睇得之餘有速度有技術，但身形方面就瘦削咗少少。佢前年夏天喺日職鳥棲砂岩宣佈掛靴之前，已經健碩咗唔少，點知退休之後轉做教練，身形仲「弗」過以前。原來費托教波之餘，成日密密去健身室「掙扎」操肌，最近佢為一家線上體育博彩網站做代言大使，拍咗條廣告短片，結果出街後球迷都好驚喜費托大隻咗咁多，就連男粉絲都好受落！
36歲嘅費托上年7月攞到西班牙足協嘅職業教練牌，幫手教馬德里體育會B隊，今個月初正式做埋球隊主教練。咪以為費托掛咗靴成18個月，又要專心教波，身形就會走樣。諗番費托喺利物浦嗰時雖然勁到飛起，但身形就唔係大隻，呢日再見番佢喺AW8個廣告，就見到費托一身肌肉好澎湃！片段開頭，西裝骨骨嘅費托已經好四正，一換番件Polo恤，就幾乎撐爆件衫。
又靚仔又大隻，莫講女仔，就連男粉絲都抵受唔住，好多球迷留言問費托「係咪要去WWE玩摔角」、「幾時變到咁大隻」、「你件衫就快着唔落」。仲有人話𠵱家嘅費托係前曼聯名宿尼曼查維迪嘅噩夢，當年呢兩位宿敵喺雙紅會鬥得激烈，留低好多經典畫面。
講到大隻佬，其實足球界都搵到唔少，但突然之間變身大隻佬嘅話，拜仁慕尼黑中場哥列斯卡就真係最經典。上年球壇因為疫情停擺，呢位德國球星成個假期都勁勤力健身，結果一開季就變咗大隻佬。佢話自己主要操吓體能同舉吓鐵，結果屋企所有用得嚟舉嘅，都俾佢物盡其用。另一位大隻佬，梗係要數同樣靚仔又大隻嘅基斯坦奴朗拿度，呢位葡萄牙球星出道嗰陣亦係身形瘦削，但佢之後好注重飲食，加埋瘋狂健身，踢緊皇家馬德里嗰時身形已經「弗」爆，過檔去祖雲達斯之後，仲越嚟越大隻㖭。
仲有一個經典例子，就係籃球界嘅NBA名宿碧比。打籃球手瓜起腱好似好正常，但球員生涯已經幾大隻嘅碧比（Mike Bibby），2012年退役之後仲瘋狂操肌，前年佢喺網上分享同阿仔嘅練波相，就令到大家好驚訝，事關碧比手臂仲粗過唔少人大髀！
