現年35歲的翟威廉去年與哥哥Wilson等合資50萬在佐敦開設清酒舖，由於逆市開舖，翟威廉凡事親力親為，經常忙到要在舖頭過夜。可惜香港武肺疫情失控，油尖旺區連日來都有新增確診個案，港府以區內多「三無」大廈、「值得聚焦做測試」為由，於早前劃出的強制檢測指定區域內再劃出核心區，強制該範圍內的居民做檢測，而翟威廉的店舖正身處「疫區」之中。
《蘋果》昨日到翟威廉的舖頭視察，門外對面馬路圍起封鎖線，整條街設街站為巿民檢測，街道上除醫護人員及前來檢測巿民外，儼如死城般冷清。不過，為交租搵食，昨日清酒舖如常營業，在舖頭死守的Wilson說：「上星期日做咗檢測求安心，其實對生意一定有影響，啲居民都少嚟買嘢，會驚。」整個區域誠惶誠恐，Wilson無奈地表示：「惟有做足安全措施。」
對於開業後既未回本又遇上疫情，Wilson說：「之前有做餐廳批發，但𠵱家餐廳晚市停業，幸好有做網上生意幫補，若果唔係就生意淡薄好難捱。」他透露兩兄弟會各自搵食幫補：「威廉會去拍嘢，我就有教調酒，但𠵱家都好難過，希望疫情快過。」而翟威廉接受《壹週刊》訪問時，直指因要保持出貨入貨，亦要確保清酒新鮮，所以未有關閉門市打算。提到生意大受影響，他表示無奈：「啲人唔多行街，嚟呢邊都係為檢疫，而唔係諗住買嘢，幸好有做批發同網上生意。」為節省開支現時沒有聘請全職員工，凡事兄弟親力親為，執貨、包裝等都一腳踢。
此外，政府早前向花農「跪低」，急急公佈復辦年宵，身為港協暨奧委會副會長的霍啟剛昨日在社交網留言，直指：「既然花市都可以舉辦，同一個球場兩隊波加埋只係22人，仲少過行花市嘅人，政府必須盡快開返場地畀我哋做運動！」他更在留言中標明「運動強身健體對抗疫好重要」。