政府大搞抗疫宣傳，但喺大嶼山嘅臨時醫院落成竟然冇乜人講？查實係所有香港媒體都冇受邀出席儀式。事緣呢座按內地旨意興建嘅新中心，經歷四個月工程，噚日搞竣工移交儀式，但好不幸本地傳媒只能遠遠拍攝，唯獨央視可以入場錄影。
到底係咩儀式咁神秘，唔可以畀港媒出席？原來視像嘉賓包括廣東省省長馬興瑞，同深圳市委書記王偉中，可能林鄭作為「香港市長」，怕港媒得失兩名幹部，於是要預先洗好太平地。根據最偉大最正確嘅權威喉舌央視報道，呢座臨時醫院全名「北大嶼山醫院香港感染控制中心」號稱可以抵抗「10號颶風」和「50年一遇大水」，設備就有6個病房大樓，可提供136間病房，816張負壓隔離病床。
林鄭致辭時自讚香港抗疫工作基本上力保不失，亦不忘擦鞋，感謝去年中央派人設立「火眼實驗室」，做咗百萬測試，搵到3,000幾個確診。林鄭講到最後仲深深鞠躬，十足十中學生上台拎獎咁。呢座感染控制中心由招標到興建都係黑箱十足，八方不時睇到內地嗰啲聲稱抗禦「百年、二百年一遇洪水」嘅建築，最終都係豆腐渣工程，香港人只能自求無病無痛！
李八方