本月初遭警方國安處以參加去年民主派初選為名，喺警署拘押近40小時嘅南區區議員袁嘉蔚（Tiffany），獲准保釋後極速歸位投身地區工作，佢噚日朝6點幾已經喺田灣邨擺早站，據佢喺fb透露，好多街坊都上前叫佢「撐住、唔好驚」，令佢好感動，形容不經不覺間已同街坊培養咗深厚關係，見到對方都有種安心感覺。
Tiffany擺完早站、去黃店快食個早餐後，即刻長途跋涉去大嶼山石壁監獄探望多年戰友、前香港眾志秘書長黃之鋒。Tiffany事後透露，之鋒目前狀態良好，更叫佢提醒大家都要着多件衫、飲多啲水，「佢（之鋒）無論點樣都會堅持住」。
探完之鋒後，Tiffany嘅工作未結束，轉頭就去一個喺民政事務總署拒絕借場下、由民主派區議員自行召開、跟進抗疫工作嘅南區區議會會議，體力同毅力真係驚人。
李八方