英國大報每日電訊報在1月14日有報導，指保守黨及工黨議員批評著名御用大律師（QC）David Perry接受香港特區政府聘任，代政府做檢控官，負責檢控黎智英、李卓人、何俊仁等人涉嫌違反國安法；英國政府對香港特區政府拘控黎智英等，立場好清楚，但倫敦城中最出色一位大狀，竟然來港為特區政府做事，英國政府不滿，好容易理解。至於Perry是否為了極高報酬（律師費）而來港，則不得而知。佢過往為政府檢控曾蔭權、許仕仁等，聽講已獲厚酬，在倫敦未必搵得到。
特區政府律政司有好多大狀、檢控專員，對香港版國安法（以中文為準）之瞭解應該比一位唔識中文嘅英國QC更好，何解要搵洋人出馬？難道政府檢控專員唔敢主理特大案件？木宰羊。點都好啦，黎智英等要用自己錢打官司，特區政府就有大量公帑聘請英國一級紅牌QC，橫掂都係納稅人嘅錢啫！
Perry在倫敦受批評，相信會置諸不理。問律師W，點解Perry接政府委任？律師W話：「大律師接案，有一條守則，叫做Cab rank，即係架的士輪隊，來到你面前，你就要上，唔可以推搪，此乃司法公平公正原則之一，即大狀不能主觀揀客，排隊到你，就要接客！」
又幾高深噃，不過世界上有守則就有過牆梯，你知我知。特區政府每逢有超級大案，就搵到英國名牌大狀Perry，Cab rank幾好運氣呀。
律師W話Cab rank係英國普通法傳統，能體現普通法精神。呢樣唔敢同佢拗。香港人係秀才，國安法係勇悍士兵，拗得掂咩。
高官講「中國係法治國家」，幾時中國會懂得Cab rank呢個道理呢？內地代表12港人嗰位律師，幾有勇氣！但後果係被釘牌，遭遇與David Perry差天共地。
法律之事，有錢就可以多選擇，用納稅人錢就更加用得爽神。小市民諗吓都覺得沒趣，不如問通勝。睇完通勝，簡單回覆靚女F：「團年最好日係2月7日星期日年廿六，晚上5時至11時皆吉時，大把時間開飯吃飯。開年開工日最好係2月15日星期一年初四，但該日係假期，其次係2月18星期四年初七，如果在家工作，就不如在年初四凌晨一點幾開吓電腦，出email當係開工囉！」