皇上「息怒」，不是習帝後裔的我們，繼續圍爐，又開又熄，下載漫畫家蘇泳康的阿婆與大麻成Signal stickers，朋友愛死了，我頻頻轉link，次次都用大麻成OK貼紙回應。當讀到區諾軒「我不OK」的新聞，內心罪疚。一個被入N條罪、剛回到香港在酒店隔離期間被押送差館，九唔搭八係咁入，成身保釋紙的人，肢體送回酒店繼續坐檢疫監，心靈則早已被惡性侵犯N次！今時今日的香港，過萬人揹住不同罪名艱澀過日子，前路崎嶇，寒風削骨，逆行的難度，大家點會唔明，再問區諾軒「被插」的感受，問他還OK嗎，等於在血染的現場扮推理小說偵探攞景。
區諾軒抱歉說，現在無法鼓勵別人講加油頂落去這些話。唔OK好正常，你又唔係膠！請大家集氣給他鼓勵：一，肥佬黎年紀大一倍有多，鐵窗中着到隻糭咁仍然勤力運動修煉意志。二，周庭柔弱嚎哭，生日在牢中過，着七件衫抵擋冰冷還在努力學韓文整蛋糕。三，快必、之鋒與朗彥好耐冇住過酒店，等住睇你的新鮮東京體驗。四，跟電單車手拉麵師傅唐英傑分享一泊二食經驗吧。五，盧建民念念不忘保衛香港山野，你沒氣力講嘢時上窩仔山遙望重光的百年水庫，見字，打卡。