AC米蘭喺周一嘅意甲憑伊巴謙莫域梅開二度，作客2:0淨勝護級球隊卡利亞里，繼續位列聯賽榜首。伊巴雖然已經年屆39歲，不過今季依然表現驚人，加上球隊喺冬季轉會窗積極增兵，最近仲簽埋34歲嘅文迪蘇傑同伊巴一齊「雙老」拍門，睇嚟紅黑兵團今季真係好有決心要重奪久違10年嘅意甲冠軍。
近期先至傷癒復出嘅伊巴今場正選披甲，呢位瑞典神鋒開波7分鐘就喺禁區內博到12碼，親自主射破網先開紀錄。換邊後伊巴繼續發威，52分鐘接應卡拿比亞嘅長傳，左腳射遠柱破網。雖然呢球有越位之嫌，不過球證翻睇VAR後裁定入球有效，米蘭最後亦靠伊巴一手包辦2球贏2:0。另外喺比賽期間，呢位鬼才又表演秀麗腳法，控完個波後整腳蠍子擺尾傳波，39歲都仍然咁瀟。
紅黑兵團賽後以43分繼續排意甲榜首，領先第2位嘅國際米蘭3分，仲拋離少踢1場、排第5位嘅祖雲達斯成10分。米蘭今季表現驚人，伊巴呢位老將好大功勞，雖然佢今季只喺意甲踢咗八場波，但已經入咗12球，𠵱家喺意甲射手榜嘅第二位，只落後首位嘅基斯坦奴朗拿度（C朗）三球。
雖然伊巴好勁，米蘭又排榜首，但冬季轉會窗佢哋依然係意甲勁旅中最積極一隊。曾經效力祖雲達斯嘅克羅地亞前鋒文迪蘇傑星期二落實加盟米蘭至今季結束為止，佢將會着上9號波衫為米蘭作戰。伊巴日前受訪嗰陣都有講到呢單交易：「下半季嘅賽事會更難踢，文迪蘇傑加入我哋嘅話肯定係好事，我同佢一齊落場嘅話，肯定會嚇死對手嘅後防球員。」
米蘭已經唔係昔日嘅超級豪門，加上武漢肺炎疫情下可以攞出嚟增兵嘅資金唔多，簽自由身球員同借人就最適合。除咗文迪蘇傑，喺米蘭擔任技術總監嘅名宿馬甸尼亦確認，球隊會由英超車路士借用中堅湯姆利：「借用談判已經到尾聲，𠵱家只係等我哋最終落實。湯姆利係一位好有質素嘅球員，我哋亦都相信佢能夠同我哋現有嘅後防產生良好嘅化學作用。」就睇睇米蘭嚟緊多埋呢兩位仁兄，會唔會仲得人驚！
