球王美斯今季頭頭碰着黑，季初鬧離隊唔成，禮拜日喺西超盃決賽，仲要食咗佢球會生涯第一張紅牌，結果巴塞隆拿就算有基沙文起孖兩度領先，但最終都要喺加時輸畀畢爾包冇盃捧，美斯仲隨時要停賽四場！
禮拜日嘅西超盃決賽，爭取第14次捧盃嘅巴塞40分鐘由基沙文先開紀錄，但畢爾包兩分鐘後就由迪馬高斯近射得手扳平。巴塞到77分鐘又由基沙文近門射入，領先2:1。但到完場前，畢爾包靠罰球攻勢由維拿利巴追成2:2，要加時比賽。畢爾包加時三分鐘，由伊拿基威廉斯妙射破網，今場首度領先。
比賽到完場前一刻，本以為阿根廷球王美斯可以再次做救世主，點知佢帶波推進嗰陣同維拿利巴發生碰撞，美斯仲出手拍落對方個頭度，球證翻睇VAR後直接紅牌驅逐美斯出場，最終巴塞10人應戰下無力追平，眼白白睇住畢爾包捧起隊史第三隻西超盃。
賽後焦點自然落喺被逐離場嘅美斯身上，今次係33歲嘅美斯喺巴塞一隊首次領紅，喺佢整個職業生涯之中，曾兩次為阿根廷國家隊效力時被逐，分別係2005年國際賽「地標戰」對匈牙利，同埋2019年對智利嘅美洲盃季軍戰。西班牙傳媒就話，西班牙足總今個禮拜會開會，決定美斯停幾多場，由於美斯係直接領紅被逐，所以至少都要停兩場，但隨時追加到停四場！
巴塞教練朗奴高文賽後就為美斯護航：「我明白美斯點解咁做，因為我都數唔清對方有幾多次侵犯佢，每次佢想帶波都會俾人侵犯，所以佢先會『還拖』。」至於俾美斯報復嘅畢爾包前鋒維拿利巴就話：「我當時用個身擋住咗美斯嘅前進路線，所以佢先咁嬲，然後用手打我個頭，佢犯規大家都好清楚，呢點冇得拗。其實兩隊球員都有犯規動作，我哋有，佢哋都有，但我哋贏波嘅關鍵就係唔放棄。」
至於梅開二度嘅法國球星基沙文賽後就嬲到爆，仲話巴塞後防溝通唔好，先會搞到完場前俾對手靠罰球攻勢扳平，搞到佢加盟巴塞以來仲未贏過任何錦標，成為咗黑腳！