上星期澳職1贏1輸，今個星期繼續玩澳職；星期二中岸水手（圖）主場對住西悉尼流浪者，水手頭兩場全勝，好多人都覺得意外，其實佢哋上季尾開始，已經變得穩打穩紮，唔再係魚腩部隊，慢慢打起坐古奧、佐敦施米利呢班00後，其實有前景。水手隊波就唔講名氣，老大哥麥西蒙叫做精神領袖，不過入波唔使靠佢，開季球隊入三粒，都嚟自唔同球員，進攻瓣數都幾多。
西悉開季已經踢咗三場，勝和負各一，三場波表現都幾唔穩定，上場悉尼打吡，係就係逼和「王者」FC悉尼，但講真只靠對方門龍嚴重犯錯，先入到一球，把握力真係唔掂，唯一優點係球隊踢法都幾對抗性，今場比賽節奏都唔會太流暢，一向鍾情澳職入球「大」嘅我，今場都捧唔落手，揀番個「細」，以水手個勢咁好，有得受讓平/半，就一定轟落去。
至於星期三有珀斯光輝主場鬥阿德萊德聯；因為疫情，澳洲各省隔離令唔同，珀斯要到星期三先踢第一場；原本光輝上年12月踢過亞冠盃，可以秤高啲，不過亞冠盃嘅戰果都幾令人失望，而且停咗超過一個月先踢返波，乜都攤凍晒啦，狀態唔及踢咗兩場嘅阿聯。阿聯上場贏到墨爾本城，雖然受惠於對手有紅牌而踢多件，不過前鋒杜米祖歷狀態真係唔錯，而且開季兩場不敗，阿聯受讓平/半一樣要下盤，考慮埋阿聯攻力都唔錯，呢場都可以博「大」。
文：黃耀富
【資料寶藏】
澳職開季只有一隊全勝之師，就是中岸水手，水手已連勝紐卡素噴射機及FC麥克阿瑟。