【娛樂人物】《造星III》奪獎後減稜角 陳葦璇戒衝動

【娛樂人物】《造星III》奪獎後減稜角 
陳葦璇戒衝動

用「士別三日,刮目相看」這句說話來形容只有25歲的陳葦璇(原名陳嘉茵,Kira),最為貼切。她在2015年曾以「Kayan」此名字加入女子組合As One在樂壇發展,去年剪掉了一頭長髮重新出發,參加ViuTV的《全民造星III》勇奪第二名,更為其人生帶來全新轉變。

以女子組合As One入行的陳葦璇,當時外貌嬌滴滴,可愛的造型吸引了不少宅男fans,到了2020年,她突然以中性短髮look參加《全民造星III》,最終在眾多對手中脫穎而出,成功得到第二名。

■陳葦璇坦言之前比較戰鬥格,現在學習令自己平和一點。

台灣思前路

日前Kira接受《蘋果》訪問,以一身牛仔褸襯同色短裙的造型現身,卻未感受到在比賽期間所帶來的壓迫感,她笑說:「林二汶話個稜角冇咁犀利,一開始《造星III》嘅時候,可能因為要比賽,成個戰鬥格,睇落好似好兇狠。不過經過阿祖(梁祖堯)同二汶嘅workshop後,磨去咗稜角,對人有番啲親切感。」Kira還說:「我鍾意𠵱家嘅自己,不過我今年25歲,話大唔大,話細唔細,但係唔知點解畀人感覺,好似身經百戰,好老練!」 提到今次參加《全民造星III》,她坦言獎項並不重要:「之前覺得自己狀態唔好,所以同公司提議要停一停,之後又去咗台灣旅行,識咗一啲喺台灣做音樂嘅朋友,傾傾吓講到自己點樣可以喺呢行搵番自己嘅character,究竟自己鍾意邊一類型嘅音樂?之後返到香港,我都不停喺度諗,究竟我係想做一個乜嘢類型嘅歌手。參加完比賽,知道自己想要啲乜嘢音樂,之前覺得自己好難同人哋接近,喺圈中好難識到好親密嘅朋友,但係今次俾我識到呢班好朋友,我仲學識坦然咗,冇咁着緊所有嘢,好開心有呢一個經歷。」

而比賽期間發生了一個小插曲,Kira在排練期間因B4組的組員阿左不經意地說了句:「我好開心可以同dancer一齊跳舞啊!」令她感到不滿並說:「如果我跳得不好,是我的能力問題。如果我跳得好,為甚麼我要被稱為dancer,而且我付出的比dancer更多,我有對口型,我有表情,我所做的是一個artist所做的事,我不是站在後面伴舞的。」言論一出,Kira即被舞蹈界及網民圍攻,重提事件,她說:「嗰陣係好手足無措,我都有問二汶同花姐,花姐睇完話明我講乜嘢,所以先俾片段出街。二汶寫咗好大段文字俾我,嗰段時間嘅心情同壓力好大,影響咗我嘅情緒處理得唔好,佢理解我嘅諗法同感受,但係佢希望我經過今次事件,做人可以沉實啲,唔好咁衝。經過今次事件,我知道任何一件事都有佢嘅不足之處,希望自己可以冷靜啲,唔好俾自己嘅情緒撻到咁高漲嘅位置。」

從前慣獨行

Kira坦言:「可能我以前係運動員,一直都係獨行獨斷。經過呢件事,再加上『戰狼11』嘅體會,學識多啲了解別人嘅感受,我從來都冇睇唔起嘅意思,不過對我嚟講,係好嘅經驗。」

撰文:唐琛悠

■《造星III》比賽時,陳葦璇(右一)因不滿被稱為dancer而引來連串是非。 互聯網圖片

■Kira熱愛跳舞,唱跳俱佳。 資料圖片

■陳葦璇在《造星III》獲亞軍。 資料圖片

■Kira希望自己為人處事可以更冷靜。