當日now新聞部前主管張志剛退休，出身TVB嘅陳鐵彪空降入主，盛傳「任務」係要整頓now新聞部，而李偉亮同兩名前TVB高層吳宜婷、葉惠民亦先後空降入now新聞部，可謂帶足人馬將now新聞部CCTVB化，李偉亮突然劈炮，仲要噚日就last day，自然引起好多猜測。
有知情人士同八方講，今次助理總監李偉亮走或者同陳鐵彪嫌佢「辦事不力」，話說上周陳鐵彪曾對李偉亮有參與審核嘅節目《政情》「有微言」，更有傳陳鐵彪人前人後話李偉亮幫唔到佢手。其實陳鐵彪空降後，舊年9月曾鬧出now嘅政論節目《大鳴大放》請民建聯立會議員李慧琼做主持嘅風波，而《大鳴大放》嘅監製正係李偉亮，呢單嘢亦搞到陳鐵彪成為新聞人物，據聞事後李偉亮喺now轉為低調，連參與日常運作都少咗，唔知係咪咁令陳鐵彪覺得佢交唔到功課。
李八方