火星人降落地球，要你用一個tweet，去概括東/南亞港口城市近代史，咁樣答錯極有個譜：
「大航海時代，歐洲勢力嚟到呢一帶，沿海開埠。每開一個港口城市，附近嘅人就用腳投票湧入。每當歐洲勢力撤退，港口城市就會謝皮（除咗被獨立嘅新加坡）。」
火星人問：咁到底歐洲勢力有啲乜獨門秘技，會吸引啲人四方八面湧入？
唔係船堅炮利，就算打得，唔代表啲人會想入嚟。更何況，有啲港口例如Madras係領主主動叫歐洲勢力過嚟搞旺個場，另一啲就係買嘅，例如新加坡。
自從英國勢力喺印度洋一帶開埠之後，就將目光放喺印度同清帝國中原之間嘅南洋，開拓馬六甲、檳榔嶼、新加坡等等。呢啲埠，一早預咗唔係settlers colony，唔會有好多歐洲人嚟定居。個計劃由頭到尾，都係「英國旗+華人商人」。
米字旗品牌一出，大家就會明白，呢度係有「財產+自由」保障。所以個方程式，係搵啲本來都幾旺吓嘅港口城市，插支米字旗，然後啲華商就會加倍湧入，跟住個場就會好旺。
火星人問：吓？財產+自由，就係咁咋？咁點解其他人例如清帝國都唔咁做嘅？
百幾年嚟，事實不斷證明，有啲嘢，X國人做到的，Y国人就是做不到。「財產+自由」保障，前題係要有法治，去限制政權嘅武斷權力。畀多幾多年佢，清帝國都係做唔到，清帝國之後嘅政權，到今時今日，都係做唔到，做唔到就係做唔到。
於是乎，個人口移動模式係：出面嘅人，湧入英治港市。而當一個英治港市消失，例如上海1949，就湧去另一個英治港市，例如香港，或者索性去settler colonies，例如澳美加，甚至去返源頭英國。政壇最大loser前特首家族，由威海衛嚟香港再去英國，就係一個標準示範。
米字旗撤退，即等如「財產+自由」保障撤退。撤退之後接手嘅政權，例如獨立印度政府，絕對冇誘因，去公平評價米字旗時代嘅孟買。妖魔化前朝更符合利益，正如國共將上海自由區，描繪為烏煙瘴氣黑幫當道嘅巴比倫式舊上海。
香港代表自南京條約開始嘅所謂百年国恥，表面上係恥於唔夠鬼佬好打，俾人整咗幾忽租界。實則上最大嘅恥辱，係英國由上海到香港，不停向世界示範「英國人做到的，中国人就是做不到。」當然英國唔係有心奚落，甚至有時惋惜清帝國/中国教而不善，但當然咁樣只會令個恥辱加乘。
鄧小平同志上台，講明中共暫時要忍辱負重。放諸西方外交，即係要韜光養晦，對美國扮矮仔。放諸香港事務，即係繼續周恩來嘅「長期打算，充分利用」。扮矮，係為咗有一日要翻盤。香港呢個国恥，總有一日要清算。
以為政權「點都唔會同錢作對嘅」，實在太過睇少中共對初衷嘅毋忘。翻盤係必然，問題只係時機。中国夢係價值觀，時機則係判斷。移交頭廿年未報，唔係因為礙於乜嘢聯合聲明等廢紙，只係判斷時辰未到。
當卧薪嘗膽嘅大国崛起到一個點，偉大領袖感應到天機，宣佈係時候告別韜光養晦，迎接天朝主義中国夢。雪恥，就係對美國挑機，拉攏啲一帶一路嘍囉，去建立北京為首嘅平衡體制，抗衡甚至取締華盛頓共識嘅國際體系；對香港反枱，廢除一国兩制，消滅「財產+自由」嘅保障。
中共度過可稱為Annus mirabilis嘅2020，只會覺得天命難違。當加速掣喺香港加速㩒，無論係忍辱負重十年又十年嘅土共，定係適時務轉軚嘅新愛国，呢啲講香港話嘅建制，突然發現自己原來企喺刀口最前線。佢地一面自掘墳墓一面畀啲掌聲自己政治行為藝術表演，終於嚟到謝幕嘅一刻。
撰文：宋漢生
fb : sunghsblog