上星期五行路去陸羽飲茶之時，在萬年大廈周大福門口碰到靚女F，畀佢嗌住：「Uncle，阿媽成日叫我問你幾時團年最好、新年開工吉日；啱嘞，依家撞到你，唔該講一講，等我唔駛畀媽咪煩住！」靚女F出嚟打工已有20年，但呢一輩人物，多數唔識睇通勝，一年一度要知道吉日良辰，寧可信其有喎。但平時行事，只憑興之所至，邊會得閒擇日呀！
問番靚女F：「今年仲團乜年呀：政府叫大家少搞家庭聚會，唔好拜年呀，酒樓又冇晚上堂食，限二人一枱，一家人點坐得埋啫！」靚女F答：「阿媽好想叫晒阿哥、家姐及我一家總共十一人，加埋兩老就13人，一齊返屋企食團年飯呀，以往年年都係去阿媽家居附近間酒樓嘅，今年阿媽話自己煮幾味畀我哋食！」咁難為老人家，不如買外賣算嘞，靚女F話13人在家食外賣，好似冇乜誠意。咁講法，咪有好多「家人聚會」？陳姑娘會唔會明令禁止呢？
上到陸羽，生意清淡，睇見都冇心機。餐廳R到咗之後，大發牢騷，話禁止晚上六時後堂食，直情係攞命，農曆年過後，估計大把食肆會執笠，佢一位（外籍）老友在灣仔經營酒吧，以前養一家四口，綽綽有餘，只是去年至今蝕到嗌救命，不幸近月驗身發現頑疾，已用盡積蓄治病，搞到一家四口連吃飯都成問題，老友聞者心酸。餐廳R話政府冇新一輪救濟金都算嘞，佢願意跪求「父母官」准許餐廳晚上經營到九點，准四人一枱，等食肆可以苟延殘喘！
父母官云云，只懂聽北京阿爺話配合，邊會聽到蟻民訴求。食完飯想起靚女F之言，去報攤買本「通勝」，後來回家時在地鐵站行經奇華餅店，心思思去睇吓有乜年貨，見到有不少應時食品，有素食鮮淮山雜菌素糕、薑汁黑糖年糕、黑芝麻花生糖、亞嫲糖年糕、蓮子綠豆糕、傳統臘味蘿蔔糕、賀年錦盒等等，都幾吸引，打電話問老婆：「要買邊啲返屋企？買幾多？」點知老婆大聲喝住：「今年未必有人來拜年，我哋一定唔去拜年，你唔好買乜買物！」當堂縮窒，睇定啲先咯，2月12日年初一，可能係香港歷史上最冷淡的新年（1942~44年除外），諗吓都冇癮。