唔知大家記唔記得中大有個好「識食」嘅女教授李薇？呢位中大政治及行政學系助理教授，上年唔滿意市民浪費食物，竟將農曆七月市民路祭嘅食品執返去煮成三餸一湯，全城譁然，但佢就擺出一副「我開心關你屁事」態度，換嚟祭品食家外號。最近佢又成為網上紅人，今次唔關祭品事，而係有人疑濫用長者八達通斷正，喺港鐵站發爛渣。
網傳片段李薇喺深水埗站俾職員捉到正用長者八達通，喺大堂失控尖叫，要黨鐵出動五個男女職員手拉手將佢圍住，李教授全力頑抗黨鐵霸權，解釋「用錯咗八達通」冇用，就斥黨鐵職員係「資本家嘅走狗」，後來職員搵PoPo求救，但李教授見PoPo竟然改玩「篤灰」，訓斥佢哋「點解唔搵我同事馬嶽（中大政政系副教授），你哋點解唔搵我同事李家翹（中大政政系講師），佢違反國安法！我用錯八達通你哋就拉！」
PoPo話前日接獲港鐵職員報案，話一名女子喺深水埗港鐵站疑使用特惠八達通卡入閘，職員向該女子查票但對方不合作，於是報警，案件列作「違反《香港鐵路附例》」交港鐵處理，而中大就話如有大學成員被裁定觸犯法例，校方會按既定程序處理。
李八方