上周五宣佈退休執起教鞭嘅前英格蘭前鋒朗尼，隔一日就已經要帶隊打波。不過上周六朗尼正式成為打比郡領隊嘅首戰，鬥同樣排榜下游嘅洛達咸，球隊就臨尾香0:1輸咗呢場「六分波」，更加跌到落尾二位置，一盤冷水淋落朗尼度，要護級成功真係要睇吓朗尼教波功力，有冇踢波嗰陣咁醒。
上周五先正式坐正打比郡主帥嘅朗尼，上周六就帶隊惡鬥本來低自己一位嘅洛達咸，打比郡全場其實有高達64%嘅控球，而且踢落都係主動啲嗰隊，不過始終未能夠入波。臨完場前四分鐘，洛達咸一次傳中攻勢，打比郡守衞解圍唔遠，俾對手中場占美連斯混戰中把握機會撞射破網，最終洛達咸亦靠呢個入球一球小勝打比郡，仲同打比郡互換位置升上尾三。
朗尼全場喺場邊都相當肉緊，不時同教練團商討對策，球隊尾段失波佢都難掩失望抱頭。賽後接受訪問時，朗尼就指球隊嘅表現明顯唔及對手，「呢場波洛達咸技術性擊倒咗我哋，我哋不論用波同集中程度都唔喺應有水平。」朗尼亦都有講，雖然近期武肺疫情有啲影響球隊備戰，但呢個唔係藉口，希望全隊上下嚟緊可以踢出水準。
有份評述比賽嘅英格蘭名宿荷杜喺賽後就認為，朗尼選擇專注教波係好事，不過佢就認為呢位前曼聯前鋒應該繼續做球員兼領隊，「我認為佢喺呢個時間掛靴係一個錯誤，佢應該要繼續以球員身份出戰。你可以睇到隊波家陣狀態好沉，去到3、4月有啲波最尾20分鐘，如果有佢出場踢吓鎮住隊波，可能結果就會好唔同。」荷杜亦有指，朗尼對上有前英格蘭主帥麥卡倫做技術總監，相信可以喺佢身上學到唔少嘢，但要護級成功實在唔容易。
雖然計埋球員兼領隊，朗尼都只係教咗11場波，能力仲有待驗證。但博彩公司似乎就好睇好佢嘅前程，認為佢遲啲會北上教今季表現一般嘅些路迪，賠率只得2.5倍，取代蘇斯克查接手曼聯成為新一代魔君就有26倍，至於任何時候出任曼聯領隊嘅賠率就有3.75倍，又即管睇吓呢位前紅魔10號會唔會有一日回歸奧脫福教波。