樂壇最後一張成績表《2020年度十大勁歌金曲頒獎典禮》昨晚派發，莫文蔚憑一曲大熱作品《呼吸有害》奪得金曲金獎，壓軸出場領獎。而星夢一姐菊梓喬第三度奪得最受歡迎女歌星，她更全場獨得五個半獎項，成為全晚大贏家。至於最受歡迎男歌星則由周柏豪及胡鴻鈞瓜分，兩人亦各自得到兩個男歌星獎，平分秋色（得獎名單詳見附表）。
無綫《2020年度十大勁歌金曲頒獎典禮》昨晚在將軍澳電視城舉行，一如往年只由星夢及英皇歌星如周柏豪、菊梓喬（Hana）、胡鴻鈞、王灝兒（JW）、吳浩康及泳兒等支撐大局，星光黯淡。久違香港樂壇頒獎禮多年的莫文蔚，昨晚憑無綫劇《飛虎之雷霆極戰》主題曲《呼吸有害》再以大熱姿態奪得金曲金獎及勁歌金曲獎，她亦畀面現身領獎：「好耐未試過喺呢個台，好興奮，呢個獎唔止代表呢首歌，亦代表我廿幾年嚟付出嘅努力同埋大家嘅愛，都多謝TVB，因真係冇試過唱劇集主題曲，亦要多謝我媽咪，因好少機會喺我家鄉香港多謝我親愛嘅媽咪。」
至於最受歡迎男歌星由周柏豪及胡鴻鈞一同瓜分，周柏豪亦得最佳演繹男歌星，胡鴻鈞則奪最受歡迎網絡男歌星獎，他們各得兩個男歌星獎。周柏豪謂會繼續努力做好自己，而他領取最佳演繹男歌星時除多謝公司及家人外，他更謂：「今日有啲唔開心，原本有個朋友今晚喺呢度出現，但又去咗另一個地方。」有網民留言寸他：「藍神，最紅，第一排。」但亦有網民留言力撐他：「支持Pakho，愛妻狂魔，愛家庭好男人！比那個拋妻棄女的好得多，攞甚麼獎、賺幾多錢都冇用，淨係話啊媽係佢後盾？膚淺！」胡鴻鈞領最受歡迎男歌星後說：「好意外，冇諗過，第一次，攞咗好大責任，要加油。」
而Hana更成為大贏家得到五個半獎，亦第三次奪得最受歡迎女歌星，她上台眼濕濕地多謝公司等人並謂：「我要多謝一個好重要嘅人，以前我哋好少講自己嘢，但佢永遠喺我身邊，就係我妹妹。」Hana亦成為最受歡迎網絡女歌星，星夢「一姐」當之無愧。譚嘉儀則首次得到最佳演繹女歌星，她領獎時激動喊着說：「好開心得呢個獎，因今年係我入行十年，頭幾年冇乜機會唱歌，多謝網上聽我唱cover嘅人，同埋要多謝家人，上次冇我好後悔，多謝爹哋，因佢我先鍾意唱歌，希望佢喺天堂好開心見我攞呢個獎。」
除一眾歌星外，昨晚亦有不少藝員上台領獎，剛在無綫台慶頒獎禮成為視帝的王浩信，同奪人氣王大獎及最佳改編歌曲金獎，不過今次他未有再公開多謝老婆陳自瑤，另外在台慶頒獎禮上被網民力嘲殘樣的袁偉豪，入行近20年奪得最受歡迎新人獎，昨晚見他狀態明顯回勇。而鄭俊弘及何雁詩獲大會安排孖着一同上台領取勁歌金曲獎，主持也笑說：「真係夫唱婦隨。」
另外，近日武肺疫情依然十分反覆，防疫措施不應鬆懈，雖然出席歌手及嘉賓在台下戴上口罩；以及每兩個座位間有膠板隔着，但頒獎禮甫開場先由十多位歌星如戴祖儀、譚嘉儀、BOP天堂鳥及曾中過武肺的施匡翹等合唱《Over the rainbow》時，他們並肩排在一起卻全部沒戴口罩，不過眾人似是「咪嘴」上陣。而得獎歌星上台時同樣「無罩上陣」，只有三位主持區永權、陸浩明及許文軒戴上透明口罩，認真危危乎。
