土耳其城市伊斯坦堡最近落起大雪，當地嘅球場亦都鋪上咗層厚厚嘅積雪。不過喺上周六施華斯堡作客鬥巴沙克舒希嘅土超賽事，客隊竟然喺咁嘅天氣底下，依然選擇着上全白嘅波衫出戰，結果就好似有保護色一樣，從直播鏡頭望落去啲球員就好似隱咗形咁。不過，施華斯堡唔單止呃到對手，仲fake埋自己隊友，球員都睇唔清楚自己友喺邊，仲俾對手喺38分鐘先開紀錄。雖然佢哋喺四分鐘後就追平比數，但最後都只係同對手打和1:1。除咗球場上嘅球員踢得辛苦，當地球迷喺電視睇直播仲辛苦，好彩嘅係個足球係橙色嘅，唔係嘅話只係睇住一隊人喺球場上跑嚟跑去。有球迷就話，落雪仲着白色波衫，根本係施華斯堡嘅戰術，就係要對手防不勝防。