近期不少人已告別面書和WhatsApp，轉投MeWe和Signal。後者的用戶體驗未必及前者，奈何大家就是睇唔過眼霸權的霸道，透過「社交移民」表態。好事，仲有得表態。
以往，我們享受大數據的便利，如今，大概是覺得夠了，關注起個人私隱起來。眼見面書的帖文一日比一日少，筆者也曾有一秒衝動「跟機」開MeWe，免得在疫情下進一步拉闊「社交距離」，最終決定給自己一個社交冷靜期。
MeWe未開，但早陣子還是成為Signal用戶，回應家人、朋友的熱烈邀請之餘，也想親身體驗這場遷徙的可行性。
說到底，小眾要走向主流，關鍵是群眾的擁戴。這是icq沒落，msn冒起，msn失寵，WhatsApp稱王的關鍵，若然Signal衝唔出「小眾定位」，未能在短時間內獲得肯課金的critical mass，加上WhatsApp仲肯推遲用戶接受新條款的死線至5月，呢場仗要贏唔易。
「轉場」情況在本港證券界都發生緊，只是大家由港資券商轉投中資券商懷抱，富途牛牛短時間成功在港插旗，重寫兼刷新股民對券商的認知和定位，用戶數目幾何級上升。不少人口講反壟斷、反中資，在着數當前，當初的堅持現已令你很懷疑，筆者有時候都睇唔透。
虛銀卻因盈利模式未能令人信服，及產品未夠全面，而未入流兼繼續悶局。唔好以為唯獨銀行客忠誠度最高，過去一、兩年部份人已轉開離岸戶口，資料緊要，資金安全仲緊要，但用富途牛牛炒股就唔緊要。
講起大遷徙，虛銀落重本投放digital marketing，隨潛在用戶轉場，虛銀廣告戰線延至MeWe似乎是遲早問題。今次社交媒體大遷徙會帶領大家去到一個乜野局面，夫人都想睇到最後，而且有晒心理準備，將來可能久不久就要遷徙。
杜夫人