美國銀行分析師上周發表一份報告，題目為「Will BNO emigration impact Hong Kong’s Linked Exchange Rate System？」，提到今年高達2,800億港元或移英，獲得傳媒大篇幅報道。這類題目可以歸類為「里昂風水指數」級別，本身趣味為主，常識都知道難發生，點知本總裁翻開份報告，嘩，原來認真寫㗎喎。
報告本身歸類重點有3個：1）引述英國內政部預測321,600名香港居民未來5年會移民英國；2）移民增加令人懷疑可能有龐大資金流走及對聯滙有啟示；3）2021年會有2,800億元流走，港元會輕微轉弱。
不過，細睇其分析理據，不免粗疏了。2,800億元如何計算出來？首先假設是基於英國內政部對移民人數估算；繼而估計赴英港人會賣樓，而作價是按香港統計處資料假設九龍區500方呎物業成交價730萬元計算，呎價僅14,600元。分析師再以平均按揭成數18.1%，計算本身未償還貸款水平，假設全部歸還並帶錢走人。
仲未完，美銀再用港人MPF戶口平均持有21.7萬元，再估算離開的人英文較好、技能較高、年紀較大，所以平均有30萬元可以提走。然後2,800億元資金流走就計咗出嚟。
問題喺邊？香港移民人數增加，亦有人因此賣樓，毋庸置疑。但香港金融市場過去一年非常熾熱，業界係搵到大錢，不少人留低搵食，選擇做「太空人」，老婆同子女到英國升學；而正正係咁，香港人好難大規模賣樓；就算全家搬走，唔少人寧願出租賺現金流，喺英國再買多間，倫敦以外200萬港元樓下唔難搵，好多港人買得起。
另外，九龍區呎價14,600元估算離地，MPF提走亦非必然。聰明的港人會選擇資金留港，炒美股、港股、IPO，賺大錢好過。
而其實，講移英導致2,800億元資金流走，係絕對冇意思。Capital Outflow同Net Capital Outflow有好大分別，金管局回覆本地傳媒都有提過，香港本身資金就進進出出㗎啦。現實係舊年湧入4,000億元無流走，港滙未顯著轉弱，北水破紀錄湧入港股，加上香港人未必會真係帶錢走，種種原因，呢份投行報告都頗Failed，當然最後佢都有提到對聯滙制度無影響。
程總裁