陳柏宇太太符曉薇（Leanne）一向鍾意同兩歲囡囡Abigail打扮，今次型媽又同囡囡出動，幫佢揀個型爆黑超，bear外套加鴨仔袋，加上Abigail手插袋嘅步姿，網友都讚︰「星味蓋過佢老竇。」至於其他星B都勁可愛，如鬼馬嘅李璨琛囡囡Lucy，而鄺文珣細女Chesney亦越大越似媽咪，五官好清秀。
李璨琛女兒李元元（Lucy）一向鬼馬，今次佢又有新搞作，見佢將白色底褲着喺長褲外面，扭身扭勢，媽咪就嗌︰「你個形象好核突」，但一班大人就笑到嘩嘩聲。
44歲嘅舒淇呢張素顏照冇P圖皮膚都咁正，連好姊妹許茹芸都讚︰「皮膚很咕溜」，但舒淇竟留言嫌自己肥︰「來吧！！！胖起來」，網友大嘆：「女神是否對胖有誤解？」
已經係兩子一女媽咪嘅鄺文珣，雖然已經四十有五，不過keep得好好，睇吓佢同三歲細女Chesney影大頭照，素顏下皮膚好白滑，潮媽仲宣佈社交移民「MeWe咗」。