【名家足路】
【對決場次︰禾夫斯堡vs RB萊比錫】
上星期嘅《一燈決》推介皇家蘇斯達對西維爾力保不敗，雖然皇蘇最終輸2:3，但佢哋兩度落後仍能追平，證明筆者都冇睇錯呢隊波夠韌力。同樣我話過西維爾嘅蘇索、盧克迪莊呢啲球員名大於實，佢哋又真係喺比賽入面錯失過入球良機。可惜千算萬算，就係算漏咗個摩洛哥新星安尼斯利，畀佢入三球搞掂咗，呢位23歲前鋒有身材有射術，往後值得多加留意佢嘅表現。
講返今個星期冇西甲踢，一於畀個機會好熟德甲嘅盧卡東尼，睇吓佢可唔可以一雪前恥。事關兩個禮拜前佢睇好史特加，結果俾我推介嘅RB萊比錫搞掂，今個星期佢又唔信邪，再買萊比錫嘅對家禾夫斯堡，唉！筆者之前咪講過囉，狼堡呢啲今季彈起嘅球隊，咪同史特加一樣踢道氣，實力上根本未足以挑戰前列，點贏喺歐聯淘汰到曼聯嘅萊比錫呢？
嗱！筆者唔係亂咁講㗎，禾夫斯堡今季對住德甲前八位嘅球隊，全部都贏唔到㗎，正宗係欺善怕惡嘅球隊。歇冬後對住第4嘅多蒙特同第5嘅柏林聯已經贏唔到，今仗仲要有中場大腦麥斯美艾洛特要停賽，想贏二哥萊比錫？難囉！筆者之前已經講過，萊比錫係德甲失波最少嘅球隊，反而禾夫斯堡喺聯賽榜頭10隊之中，入球數字最低，咁弱嘅攻力點破客軍大門呀？
雖然萊比錫今場都有唔少傷兵，不過佢哋近年為咗踢歐聯，加強咗陣容深度，就算今仗冇咗沙比薩，前面仲有西班牙新星丹尼爾奧莫、科斯貝治等人，對住欺善怕惡嘅狼堡，萊比錫讓半/一，一於信多次上盤喇！
文：尊嘉
《一燈決》係今季新欄目，由上月擂台盟主同上月燈神拗吓頸，睇吓讀者信邊個。