車路士球員以前被爆風流史都唔少見，泰利偷食隊友老婆、艾殊利高爾（A高爾）連番嘅桃色醜聞大家都應該仲有印象。今次疑似偷食嘅主角，竟然係過去球員時代冇咩負面新聞嘅杜奧巴，最近佢同一位陌生女子床上嬉戲嘅影片喺網上曝光，但「魔獸」事後就話自己上年已經離咗婚，澄清自己唔係偷食咁話。
42歲嘅杜奧巴過去感情生活一向好低調，只知道佢同老婆拉娜（Lalla Diakate）90年代喺巴黎相識，之後墜入愛河，2011年正式結婚。喺杜奧巴整個球員時代，基本上都冇負面新聞，非常敬業同有鬥心，最多都係場上因為太有鬥心發吓老脾，拎紅牌俾人趕出場，然後爆咗句「北京電視機」出嚟，而私底下就一直保持好好先生形象。
不過，最近喺社交媒體就流傳一條影片，片中杜奧巴同一名陌生女子喺床上玩，卿卿我我咁打情罵俏，呢個女人仲咬一咬杜奧巴個膊頭，杜奧巴亦好配合咁扮晒痛，仲搞笑話：「佢係呈陽性㗎，佢傳染咗我喇。」呢條片瘋傳後，大家都估計佢係背妻偷食，仲令呢位車路士傳奇前鋒喺網上要背負極大嘅輿論壓力。後尾呢位疑似二奶嘅身份亦被傳媒起底，佢個名叫娜美莉（Gabrielle Lemaire），係一位科特迪瓦駐比利時商會前主席個女，而且本身都係離咗婚嘅女人，佢嘅前夫係剛果共和國現任總統恩古素個孫。
周四，魔獸終於打破沉默，喺ig發聲明澄清：「我過去一直都唔太鍾意討論我嘅私生活，但近日媒體對我有太多嘅猜測喇。我今日必須傷心咁同大家宣佈，喺同拉娜一齊20年後，我同佢上年已經離咗婚喇，呢個係一個艱難嘅決定。但我哋關係依然好好，我哋將會努力保護我哋三個仔女同家庭嘅私隱。」
杜奧巴言下之意即係話自己並冇偷食，不過佢話上年離婚，就冇講確實日期，分分鐘可能都係上個月嘅事，係咪婚內偷食揚咗搞到離婚，其實都唔可以排除呢個可能性。況且，可能佢見紙包唔住火，𠵱家先事後補鑊澄清，話唔埋係班車仔舊隊友兼大滾友教路，先走出嚟想挽回形象。車路士賤男唔少，同期最經典一定係鐵血隊長泰利，年少時被爆出多次偷食，最誇張仲係「勾義嫂」搭上隊友布歷治女友四個月，搞到兩人反目成仇；佢好兄弟A高爾一樣風流，曾經同30歲金髮情婦、利物浦球隊秘書高芙偷入車路士球隊下榻嘅酒店鬼混，又被爆出多次偷食，搞到最終要同當時太太Cheryl Cole離婚。
