過去唔少英超球隊季前都會搞啲美國之旅、亞洲之旅打熱身賽掘吓金賺錢咁。不過，受武漢肺炎疫情影響，今季已經冇安排呢類型嘅熱身賽，英國傳媒更透露，按照番目前嘅情況，英超球隊喺下季季前都比較難安排熱身賽，對球會嚟講，又已經失去咗至少幾百萬鎊嘅收入。
有指一間Big 6球會建議希望可以喺英國當地舉行一個熱身賽之旅，作為冇得飛國外踢季前賽嘅應急計劃。不過，以目前階段嚟睇 ，呢個計劃可行性都唔高，事關英國當地家陣有變種病毒，雖然希望7月中前可以為國民接種疫苖，但除咗疫苖效用成疑外，當刻嘅旅遊限制都係未知之數，而目前英超賽事仍然係閉門作賽，喺呢啲唔明朗因素下，令商業贊助商同電視轉播都唔睇好呢個建議。
當地疫情嚴重，英超球會亦不斷出現確診個案，為阻止病毒繼續擴散，英超賽會發佈咗更嚴格嘅新例，就係要求球員喺慶祝入球時保持社交距離，好似上季聯賽重啟初期咁 。不過，喺周中嘅英超賽事所見，好似曼城嘅菲爾科頓入波後都照同隊友互相擁抱慶祝，唔少領隊都擔心冇法阻止球員激動「埋堆」慶祝，最終令球會受罰。