老兵打不死！周四荷甲一哥阿積士作客中游嘅川迪，早早喺開波七分鐘就靠冬季由韋斯咸高價收購擔正嘅施巴斯坦賀拿，頭槌頂入佢加盟後嘅首球，領先大半場後，點知之後拉開唔到比數，反而畀對方84分鐘追成1:1平手。阿積士教練坦哈格呢個時候諗起坐喺後備席嘅37歲「老獵人」亨特拉爾，結果89分鐘換佢入場，佢竟然先後喺90同91分鐘建功，梅開二度助球隊全取三分，亦成為荷甲史上首位完場前一分鐘先落場省兩粒嘅球員，認真犀利。
不過，亨特拉爾賽後被問到有傳前球會史浩克04想搵佢返去救亡，佢竟然回覆話自己好難做決定，因為對史浩克有同阿積士一樣好深嘅感情，但如果一定要揀一隊嘅話，就更屬意返去呢間效力七年嘅德甲球會，原因係對方深陷降班漩渦，比起阿積士更需要佢，真係有情有義。