【名家足路】
【對決場次︰禾夫斯堡vs RB萊比錫】
上個星期有捧場而又信小弟撐西維爾嘅讀者，應該都喺馬會度贏咗少少。其實呢場波睇直播嗰陣，都覺得兩隊場上形勢平均，西維爾最後都叫贏得有啲險。不過，小弟當日都有撐自己，仲買咗條4串5過關，除咗有場德甲波走咗盤，其他都中，收番成千幾蚊，周中繼續小注玩吓，就有贏有輸。講晒呢周嘅「業績」，無非都係畀各位一個參考，睇吓小弟呢個周末推介啲波，你覺得信唔信得過。
今周又揀番德甲同尊嘉兄鬥吓，仲要同上次一樣，又係RB萊比錫嘅波，又係作客讓對手半/一。小弟當時貼咗主場嘅史特加下盤，點知對輸畀佢，但今次繼續唔信邪，都係繼續要個下盤。今次RB對手係禾夫斯堡，比起史特加實力再強少少，相信可以治到RB呢隊唔係想像中咁穩定嘅球隊。其實再敲下盤有個好充份理由，就係狼堡今季主場係未輸過，連同盃賽，呢場鬥萊比錫之前係六連勝，咁都受讓半/一，抵捧啩。
再分析埋近況，RB上場輸畀多蒙特1:3，狼堡就喺落後兼10人應戰嘅劣勢下，逼和咗柏林聯，球員信心方面一定有啲唔同；至於對賽往績方面，2隊上季2循環交手都係和波收場，而且狼堡近3季聯賽主場對RB係1勝2和。
另外，尊嘉兄話禾夫斯堡呢場冇咗停賽嘅中場好手麥斯美艾洛特，應該影響好大，但係我見RB都成堆傷兵，包括新傷嘅隊長沙比薩，缺少呢位中前場樞紐，攻守轉換一定亂，所以呢場決定由邊度跌低就邊度企番起身，繼續要RB對家。
文：盧卡東尼
《一燈決》係今季新欄目，由上月擂台盟主同上月燈神拗吓頸，睇吓讀者信邊個。