早排喺歐洲行咗個圈，又玩意甲同意盃，成績都叫唔錯；今個星期就返嚟亞洲，澳職新一季就已經有好幾隊波亮相出場，當中自己就幾鍾意FC麥克阿瑟呢隊波，雖然上一場打多個情況下，都只可以逼和威靈頓鳳凰，但當中成隊波嘅磨合，同埋兩名前畢爾包西班牙外援馬高蘇沙亞達同比納特，好明顯高其他球員幾班，下星期日作客紐卡素噴射機，以噴射機嘅入球能力就真係唔使懷疑冇波入，但呢班波今季資金出現好大問題，早前仲講到話隨時散班，難免影響球員士氣，搞到後防失波問題好嚴重，呢場「大」走唔甩喇。
澳職開季頭幾場都冇咩波入，唔係1:0就1:1，追「大」嘅朋友有啲驚未？不過當球員開始進入狀態，加上澳職球隊對防守概念都一致性放寬，所以長「大」呢樣嘢，一定要追落去，唔好有動搖。事關兩隊前線都有幾高把握力嘅人物孭飛，好似噴射機前鋒奧當路雲，同客隊嘅達比舒利，除咗「大」，客軍穩定性相對比噴射機好，暫時受讓平/半都非常吸引。
禮拜六方面就有悉尼打吡大戰，FC悉尼主場鬥西悉尼流浪者；FC悉尼踢完亞冠盃返嚟後狀態穩定，作客都算輕鬆過關，前鋒方祖離隊好似問題唔大，返到主場踢打吡戰，球員一定醒神幾倍。不過又咁講，西悉開季都唔太差，打吡戰往績都唔錯，上季2勝1和㖭，初盤FC悉尼讓半/一仲可以接受，如果去到一球就係多，留番走地先見機行事。
文：黃耀富
截稿前馬會尚未開盤，盤口僅供參考，讀者記得留意足智彩網頁。