日前一眾保皇派議員力排眾議，通過用ZOOM開立法會會議嘅議案，建制派打住抗疫之名，唔認懶，但呢個措施一生效，即刻有人現形，唔坐定喺屋企、議辦用ZOOM開會，而係一路揸車一路開會，呢個咪工聯會議員郭偉強。
噚日係立法會通過用ZOOM開會之後第一日，房屋事務委員會就用ZOOM開會，郭議員可能心虛，早上9點半開會，佢就唔開視像，仲扮嘢問「主席見唔見到我？」主席張宇人一頭問號：「咩話？見你唔到，係因為你已經消失咗好耐」，催佢快啲現身，但郭唔肯開鏡頭，淨係用語音講嘢，張宇人再問：「郭偉強，入返你個視像好冇呢？」但郭仲死撐有開鏡頭，之後先開返個樣俾人睇。
點知一開鏡頭，就見到佢揸緊車，雖然佢懶醒，以為開個立法會虛擬背景就可以掩飾佢車廂內嘅背景，但係大佬呀，個人震嚟震去，塊面時光時暗，一時又露條安全帶，一時又有車內吊飾，又見到後面車窗有啲樹啊、草啊高速飛過，係人都知揸緊車啦！
不過佢算厚面皮，事後佢喺fb回應，似乎唔覺得自己犯法，仲話有盡快喺適當位置停車繼續會議，無賴到話「車上暖氣是我的避寒中心」，又話左撲右撲都是為社區服務，仲好意思叫人「大家都要注意路上安全呀」！其實根據工聯會最支持嘅警察宣傳，行車過程中「使用流動電話，分散司機的注意力，影響駕駛表現，在緊急或突發情況時，會影響司機的反應」，點計都算不小心駕駛啩？唔知PoPo會唔會做嘢？定又放生建制？
李八方