《南華早報》日前引述消息，指北京正考慮禁止BNO護照持有人在港出任公職，甚至褫奪其投票權。報道出街後在政圈、公務員圈中引起不少震動。有政界中人指，今次北京重手反制英國的BNO 5+1方案，但卻會誤傷「無辜」，「連一班最支持政府、最藍嘅公務員、甚至紀律部隊都打埋」。更有公務員說，若北京真的要落實，就應公平處理，「唔好淨係針對BNO，連拎其他外國護照、甚至家屬有外國護照嘅都一視同仁，唔可以做高官同議員」。
該政界人士稱，其實不少公務員也持有BNO，並以此作旅行證件，當中更不乏大量深藍愛國愛港人士，「其實佢哋真係求方便，又覺得用BNO可能申請美國等國家簽證易啲，你睇報紙都見，連撐警嘅譚詠麟都係用BNO就知」。亦有公務員朋友對他說，其實不少中層公務員、甚至紀律部隊內，也有不少人有BNO甚至外國護照、仔女及家人也有外國居留權，甚至已在外國居住，「原本諗住做多幾年退休，用BNO 5+1方案移民，𠵱家咁搞，隨時有一大班人提早走，快快移民算」。
另一政界人士稱，有法定公營機構的人擔心，若真的落實禁令，會否包括公營機構，「好多公營機構入面管理層也是專業人士，真係可以隨時走，反正佢哋有專業資格，出私人市場一樣搵到工，但未必咁易搵到合適嘅人頂替，特別係好多專業人士隨時有BNO或外國護照」。
更有公務員都他說，若北京真的要落實有關建議，就不應只針對持BNO公務員，持其他國家護照，甚至家屬有外國護照也要規限，「大陸都唔畀家屬係外國嘅裸官升職，如果一般公務員不能有BNO，咁應該拎外國護照、甚至家屬全部係外國嘅都唔可以做高官、議員，咁先叫公平」。
季陶
周一及周五刊出