【本報訊】前年8月機場「黑警還眼」行動，有警員稱遭示威者襲擊而拔槍示警，兩名涉案男子被控非法集結受審。拔槍警昨續出庭作供，辯方指他因撞跌女子而被圍毆，法官郭啟安亦加入盤問：「你高高大大、英明神武，撞低一個矮矮細細嘅女仔，好似蝦人咁，啲人睇唔過眼過嚟打你，會唔會呀？」拔槍警否認，又謂事後才知自己隻身衝入玻璃屋，同袍卻全數留在門外，他因而被「落單」，自言本案令他失眠發噩夢「好痛苦」。
拔槍警黃耀華昨接受辯方大狀關文渭盤問時稱，當日為驅趕示威者返回機場大堂，「唔好畀佢哋出嚟堵塞車隊」，而進入離境大堂玻璃屋。但是，根據黃於案發後兩日錄取的書面供詞，他因追截大堂內用強光射他的男子而跑入玻璃門，並拉住一名正轉身的人士。該人跌倒後，他才發現對方是女子，欲扶起對方之際，突然遭十多人衝前襲擊。
大狀指根據口供紙，黃進入玻璃屋其實是為拘捕而非驅散。黃解釋「係同一件事嚟」，並謂當時正驅散示威者，「當中有暴徒令事件發大發酵，我必須阻止佢哋煽動嘅行為，唔係事件就會擾擾攘攘」。
當日只得黃獨自衝入玻璃屋內，其他同袍卻全數留在門外，大狀問道：「覺唔覺得對自身、同埋要救你嘅隊員嘅人身安全，造成莫大威脅呀？」黃稱事後才知同袍沒有跟隨他進內，「如果我知冇人入去，我係唔會入去嘅。」
黃其後解釋，撞跌女子是意外，郭官聞言質疑其說法與書面供詞有出入，黃遂澄清是他撞跌女子，「佢瞓低咗之後，先拉起佢」。大狀指，黃之所以被圍毆，是因他拉跌女子，令旁人「睇唔過眼」；黃不同意，稱被毆是因警員在暴動所在地執勤，當時警察只得廿人，「暴徒同示威者成個機場都係」。他認為「堵路、破壞物件嘅人，都係暴徒嚟嘅」。
郭官此時向黃解釋：「讀中史都有教遠因、近因啦。近因會唔會係過程中你撞跌咗個女仔？啲人就諗，嘩，你高高大大、英明神武，撞低一個矮矮細細嘅女仔，好似蝦人咁，啲人睇唔過眼過嚟打你，會唔會呀？」黃指當時仇警情緒高漲，認為落單是被毆的唯一原因，「佢哋覺得『搞得掂』呢個警員」，與撞跌女子無關。
至於書面供詞與庭上證供不符，黃解釋案發後「日日發噩夢被人圍毆」，因精神不集中而供詞出錯；而他沒澄清供詞則因「唔想再提返起件事，因為令我好痛苦」。郭官散庭前特意慰問黃的失眠情況，他稱已尋求心理輔導並獲處方安眠藥，情況已好轉，郭官回應「咁咪好囉」。兩名被告高穎康（24歲）及麥幸雄（23歲）被指前年8月13日犯案，案件今續。
案件編號：DCCC814/19、DCCC27、DCCC28/20