恒指繼續沿住保歷加上軸同埋5天線上升，14天RSI見76.8，連續8日成交過2,000億，已確認進入類似2018年1月嘅短線尾段升浪走勢。
之前貴金屬價格上升已經踢高一批久沉嘅銅鋁鋼股，當中，較有盈利能力嘅江銅（358）走勢相對強。而舊年11月到𠵱家，漂白針葉木漿（NBSK）價格上升大約37%，晨鳴紙業（1812）爆上之後，盈利能力不俗嘅玖紙（2689）同理文（2314）啱啱先至破位，但以基本因素睇，升勢未去到終點。
疫情刺激網購，有利箱板瓦楞紙需求。舊年上半年NBSK價格未爆上之際，玖紙每噸毛利已經按半年升6%，而舊年11月開始，NBSK價格急升到破晒位，玖紙、理文都絕對有擴闊毛利嘅能力，大行平均預測玖紙截至今年6月底全年盈利按年增長33%，似乎未足夠反映基本因素，隨時有大行上調盈利預測跟尾，配合近期市況咁瘋狂，股價先啱啱破頂，短期仲有水位升，今個月內有條件試2017年高位約15元水平。
之前提過嘅藥明巨諾（2126），一支大陽燭急升13%，單日升勢已經收復晒成個月弱勢，動力相當唔錯，有機會繼續爆上，重現上市初期強勢，上望返之前高位大約33元。
晉佳