政府針對民主派區議員打壓唔係新事物，但今次用到左報嘅流料去屈民主派區議員，以此做藉口扣人津貼，真係再創新低點。今次受害人係黃大仙區議員劉珈汶，黃大仙區議會秘書處竟然用《文匯》一篇老作報道，屈劉珈汶用議辦開會傾「民間議政平台」，除非劉珈汶自證清白，否則扣起佢12月嘅區議員開支津貼！
《文匯》早排一篇題為〈【偵查報道】煽暴區員秘會 謀搞攬炒平台〉報道，話劉珈汶用議辦開會搞「民間議政平台」，八方睇返《文匯》篇所謂「偵查報道」，原來只係影到一班區議員喺嗰度出出入入，內文就寫到繪影繪聲，邊位發言、講過咩都一清二楚，唔講仲以為記者坐埋入去開會！
區議會秘書處拎住當「證據」，發信要扣起劉12月嘅區議員開支津貼。劉珈汶噚日喺fb出po，大鬧政府因為一篇生安白造嘅報道，扣佢整個12月開支，「更荒謬的是，清白的人要在14日內找到證據證明自己清白」。 劉又解釋當日開會係討論防疫工作、議辦營運開支等，同平台無關。事實上，曾任平台籌委嘅劉珈汶亦一早退出咗議政平台。到底劉珈汶可以點自證清白呢？學PK鄧話齋：「你問我點證明我今朝冇飲過可樂，我都唔知我點樣證明。」
李八方