無綫近日在深夜重播《溏心風暴之家好月圓》，悼念上周一逝世、有份演出此劇的李香琴（琴姐）。於劇中飾演「Jo飽」的夏雨重溫舊劇，連日來在社交平台拍片分享感受︰「好多場面、人事變動都令人好感慨。話晒都已經超過十年，琴姐『唔使驚，嫲嫲喺大廳』呢句台詞已經成為絕響，好多演員亦慢慢淡出幕前工作。黎耀祥由當時仲係寂寂無聞，𠵱家已經係三屆視帝，好多嘢引起好多回憶。」
夏雨昨日再拍片，對琴姐離世表達傷感︰「佢係好值得人懷念嘅演員，我哋相識幾十年，由《歡樂今宵》合作到𠵱家，唉……終於都離開咗。佢係好好嘅前輩，佢人和善，乜都唔會推搪，敬業樂業、有演員道德，值得我哋學習，琴姐一路走好。」