【西貢】音樂人周啟生日前帶同太太及囡囡到西貢開餐，但因武肺疫情第四波仍未平息，市民出外用膳仍受制於二人限聚令，因此周啟生一家三口雖然一同食飯，但他跟囡囡坐一枱，中間有塊膠板隔着坐在旁邊的太太，一向敢言的周啟生更炮轟：「呢個咁嘅政府，揸兜！」
當日下午約2時，《蘋果》在西貢碼頭旁的海鮮餐館，影到周啟生一家三口坐在露天位置開餐，他更把鬍鬚染成藍色，造型相當搶眼易認。由於目前仍實行二人限聚令，周啟生一家三口要用膠板隔開，他跟囡囡相對而坐，太太獨個兒坐在女兒旁邊。由於餸菜各放長枱的兩邊，周啟生身為廿四孝老竇，為照顧囡囡食飯，不時要企起身行過一步夾餸，難免有點不便，但一家三口邊食邊傾依然十分溫馨。
《蘋果》事後聯絡周啟生，問他為何將鬍鬚染藍？他在電話中霸氣說：「原因，藍色呢，最多做我條毛咋，我態度就係咁。」對於港府的防疫措施，周啟生狠批：「梗係慘啦，一家人三個出街都要分開行，隨時俾人拉，食飯，老竇老母同個女都要隔住塊板，呢個咁嘅政府，揸兜！」
周啟生曾在訪問中透露自己不要做廢老，不屑藝人為賺人民幣而折腰，原來當日他一早睇穿周柏豪的「藍神」靈魂：「我希望梅姐（梅艷芳）未死，梅姐未死佢會幫。冇啦！講唔到啦！其他嗰班人，你望吓，全部老嘅嫩嘅，由許冠傑去到周柏豪，冇一個人講過一句嘢！代表乜呀？我覺得佢哋多數都係畏忌返內地撈嘢個關係囉！」
現年59歲的周啟生結過三次婚，首任太太為無綫前電視藝員盧影瑂，兩人誕下大仔周欣樂；第二任太太則是落選港姐梁晶瑩，育有兒子周爵。至於周啟生現任太太是大提琴手司徒靄杰，兩人的囡囡名為周晴（JoJo），現年九歲。前年逆權運動中，周啟生曾在社交網上載父女合照及留言：「JoJo說：爸爸，我真的很喜歡這裏，我愛香港，但是為甚麼它會成為一個戰區呢？」
