建制派想喺立法會進一步用ZOOM開會，噚日由內會主席李慧琼提動議，建議由即時起到今年9月30日，立法事務委員會、法案委員會或任何小組委員會可因應委員會主席決定用ZOOM開會，唔使成日返立會，班建制派梗係大大力支持，但八方估唔到謝偉俊為咗力撐ZOOM開會，竟然可以將「電子裝香已經非常普遍」、「性生活都喺網上解決咗好多」拎埋出嚟講。
其實成個立會得陳沛然同鄭松泰唔贊成，表示存在安全隱患，不過其他橡皮圖章當然唔係浪得虛名，隱患唔使解決，夠人投贊成票咪通過囉，但八方估唔到，「忠誠反對派」謝偉俊發言撐ZOOM時，竟然撐到盡，話「今次安排只係非常時期下臨時措施，電子裝香已經非常普遍，性生活都喺網上解決咗好多。」無啦啦變咗討論謝議員性生活，嚇到人個心離一離呀。
其實謝偉俊嘅驚嚇事件成日都出現，最經典莫過於1999年佢為《壹週刊》拍攝一輯近全裸寫真，嚇到律師會收到投訴要展開聆訊，又停牌又罰款，擾攘十年。謝偉俊夫婦又不時公開講婚姻生活，例如白姐姐坦言「係有名無實夫妻，廿多年沒行夫妻之禮」。陳沛然喺會議上引用Serrini嘅網絡安全隱患就非常適合謝議員：「一手撕開全部封印」，相信都照樣令佢「感覺很安全」。
李八方