做咗議員超過八年嘅民建聯梁志祥，上周喺財委會開會期間，同黨友示範咩叫「發夢」，連政府幾時會派官員回答議員質詢都唔清楚。梁志祥噚日喺立會話，以後如果認為有需要，都會先喺工務小組要求將撥款項目分開表決，確保政府派員出席財會回應質詢。梁好似認衰，但其實昨早佢仲想將責任推落工務小組主席謝偉銓身上，點知又俾謝踢爆佢冇睇文件，咁先冇得卸。
謝偉銓噚日開工務小組會，先重提梁甩碌事件，話如果有議員認為應分開表決撥款，記得提出，梁志祥發言，話記得上次開會，講到屯門基礎設施同元朗錦田南基礎設施為同一個項目，當時佢黨友周浩鼎有提分開表決兩個項目，但點解去到財會，只有元朗撥款有討論，仲反問謝係咪判斷出錯，認為元朗項目要討論，屯門就唔使？
謝偉銓澄清，當日周浩鼎係要求兩個項目，但之後就提交文件，話只要求分開表決元朗錦田南項目，而秘書處仲書面通知所有委員，謝暗寸梁志祥：「可能梁議員你冇留意到，如果你嗰時話『唔係喎，我都希望討論』，其實可以隨時提出。甚至財委會開會前一個工作天都可以提出。」謝仲話，重提上星期單嘢，係希望委員留意下提分開表決，而梁志祥知道又衰咗，只好回應：「知道，知道。」
李八方